Dit jaor haw de wirkgroep Daag van de Modertaal van Veldeke Limburg i.s.m. L1, OR6, ’t Hoes veur ’t Limburgs en de Raod veur ’t Limburgs ’n sjoan idee oetgewirktj.
’t Thema van deze daag woor ’t belang van oos ónmisbare vriewilligers en minse die oos dialek ’n werm hert toedrage, in ’t zunke zètte. Dit alles ómlies mit live meziek, gemaaktj door, leefs jónge, muzikante oet de betreffendje krink. 6 Kringe ginge de oetdaging aan en höbbe zich geprissenteerdj.
Tösse 13 en 16 oer woor Henk Hover live op L1-radio mit Plat-eweg. De oetzenjing waerdje deze daag live opgenómme vanoet Weerstand in Remunj en stóng dus gans in ’t teike van oos Limburgse taal, meziek en de onmisbare vriewilligers. OR6 (de lokale omroop van de Roerstreek) maakdje van alle interviews en muzikale intermezzo’s opnames, die geer op zóndig 23 fibberwarie kós trökkieke en ouch noe nog te bekieke zeen via de website van OR6 (‘Wo höbbe veer ’t euver’ / Daag vd Modertaal).
Vanoet Veldeke Krink Ech waerdje de muzikale biedrage verzörgdj door zenger en leedjessjriever Josh Mosa oet Ech, begelèdj op gitaar en móndjharmonica door Erik Beurskens oet Ell en oppe cajon en percussie door Rens van Zon oet Zöstere. Zie brachte ’n sjoan leedje äöver Ech, det ederein oet Ech en ómgaeving mitnumtj nao hieël herkènbare plekke.
Marc Jessen lag oet wie hae zich op zien eige wies inzèt väör de Limburgse taal. Hae zètj oos modertaal ónger angere in de kieker door zien biedrage aan de Pejjer vastelaovesgezèt, es vaste mitwèrker bie de Echter Revue en es ein van de correctors van oos eige Brónsgreun Beukske.
Ouch kóste alle aanwezige in ‘De Babbelbox’ reagere op diverse stèllinge, o.a. woróm ’t dialek väör hun belangriek is, wie ’t plat gepromoot kèntj waere op peuterspeelzale, waat ’t belang is van väörlaeze aan kènjer.
Al mit al woor ‘t ‘ne hieële succesvolle middig, wo-op volop kontakte gelag waerdje tösse de aanwezige, die allemaol ’n werm hert höbbe väör hun modertaal!
