’t Volgendje digitale Echter Dictee, det vanaaf 1 april te make is, zal ’n waord-dictee zeen: 15 bekèndje of minder bekèndje sjeldjwäörd. Daomit is dit dictee weer lekker kort, waat de deilnummers bliekbaar waardere. De ieëste digitale dictees zeen good bevalle, mer de meiste deilnummers vènje det ’t nog korter moog zeen. “In ’n kerteerke te make; den sjuufs se ’t neet väör dich oet.”
Daomit is raekening gehaoje bie ’t dictee waat noe aangebaoje weurtj.
De deilnummers moge ouch bès kóntent zeen mit de resultate, want ’t aantal gemaakdje foute vèltj bès mit. Det kan edere deilnummer zelf zeen op de persuuenlike trökkoppeling, die m’n krig es weer ’t emailadres moge gebroeke. Op die meneer geitj ’t neet óm de foute, mer óm d’rvan te lieëre en de volgendje kieër baeter te doon.
’t Nuuj dictee bestuitj dus oet 15 aoj Echter sjeldjwäörd. Ederein dae det wiltj kan dees digitale oefening thoes op de computer make. Klik daoväör hie ónger op de link en den kömp se vanzelf in ’t dictee-formulier. Dao kan m’n ouch aangaeve of m’n mit naam en/of emailadres in de scorelies wiltj waere opgenómme.
Vervolges kan m’n de wäörd sjrieve. Die waere waord väör waord väörgelaeze. De deilnummer typtj d’r ónger wie hae of zie dènktj det ’t gesjreve zoe mótte zeen. Door op ’n pielke te drökke kan m’n de väörgelaeze teks versjillendje kieëre opnuuj beloestere. D’r is dus genóg tied.
Wae det wiltj, kan zien dictee aan ’t ènj ouch insture en laote naokieke. Det gebäörtj den automatisch. Väör spelling gebroektj ‘t programma de spelling van Veldeke, zoa es die te vènje is in ’t Brónsgreun Beukske, editie Echt-Susteren en in de Zösterse Kal.
Ónger aan ’t dictee is de mäögelikheid óm opmerkinge te make. ’t Streve is, gebroek makendj van de ervaringe en de reacties, maondjeliks of twieëmaondjeliks ’n nuuj dictee aan te beje.
Klik ónger de foto op “Digitaal Waord-Dictee” óm nao ’t dictee te gaon.
