De Daag van de Modertaal weurtj internationaal gevierdj op 21 februari. Ómdet det dit jaor midde in de vastelaovendj woor, is beslaote óm op 21 februari niks te organisere. Toch krig de samewirking tösse Veldeke Limburg en L1, die sins ’n paar jaor op dit puntj bestuitj, ’n vervolg. Ouch dit jaor zal Henk Hover in zien programma ”Plat-eweg” aandach bestaeje aan de Daag van de Modertaal, en waal op 18 mieërt. Den is ’t Halfvaste en w’r vènje det dae datum toch ’ne link haetj mit oos Modertaal. De daag väör de 18e kómme al versjillendje Kringe van Veldeke aan ’t waord. Veldeke Ech op woonsdig 15-03 mit ’n filmke op facebook en www.L1.nl
Nao ideeë vanoet de kringe haetj ’t bestuur van Veldeke Limburg beslaote dit jaor aandach te gaeve aan ’t book ‘Vastelaovesmonumente in Limburg’, oetgekómme in november 2022 en gesjreve door Leon Hamans en väörzeen van foto’s door Hans Simons. In dit sjoan oetgeveurdje book zeen alle vastelaovesmonumente van Limburg opgenómme mit ómsjrieving en foto. Väör de oetzending haetj edere deilnummendje krink oet zien wèrkgebied oet dit book ein monument gekaoze. Veldeke Krink Ech haetj ‘De Stein van de Slek’ nao väöre gebrach.
Bestuurslid Ruud Roumen van VKE, haetj ’n gesprek geveurdj mit Broer Vergoossen, Peter Kleijweg en väörzitter Roy Peters van vastelaovesvereniging De Aester Sjaelen Uul. Daovan haetj Rick Vechel, cultuurcoach bie Menswel, professionele filmopnames gemaaktj ter promotie van ’t radioprogramma Plat-eweg op sociale media.
Gesprekke en passendje meziek zeen te beloestere op zaoterdig 18 mieërt tösse 13.00 en 16.00 oer op L1 in ’t programma mit Henk Hover.
