Dees waek zeen de finales van de Veldeke Declamatiewedstried 2022. Det is naodet deze wedstried 2 jaor mós waere aafgelasj vanwaege corona. De finales zeen, wie gebroekelik, apaart väör de sjoale in Ech e.o. en die in Zöstere e.o.
Väör Groat Ech: de 19e kieër, op vriedig 8 april a.s. in de Pejjerhaof, Houtstraot 7 in Pej, vanaaf 19.00 oer. Zaal aope vanaaf 18.30 oer.
Väör Groat Zöstere: de 13e kieër, op zóndigmörge 10 april vanaaf 10.00 oer in de Hermeniezaal in Zöstere. Zaal aope vanaaf 09.30 oer.
Väör de declamatiewedstried zeen de gedichte en dus ouch de deilnummendje kènjer ingedeild in 3 categorieë: groep 3 en 4, groep 5 en 6, en groep 7 en 8 van de basissjoal. Van eder categorie zeen vanoet de basisjoale de deilnummers geselecteerdj, die aan dees finales mitdoon. Oet die finaliste weurtj door ’n jury bepaoldj, waem de 1e, 2e en 3e plaats verdeentj. Gebroekelik woor det de wènnieërs van de 1e plaats doorgaon nao de Limburgse finale, mer dit jaor is nog gein Limburgse Finale ómdet neet alle Veldeke kringe klaor wore väör de wedstried. VKE vónj aevel det nao twieë jaor niks es gevolg van de corona, ’t weer tied is väör deze wedstried. Oos nummers ein zeen dit jaor de Kampioene van ’t Smaalste Stökske van Nederlandj!
