Väörige waek dónderdig, 14 oktoaber is in de “Laeswinkel” / bibliotheek in Ech in ’t kader van de kènjerbokewaek de prissentatie gewaes van ’n nuuj beukske, bestömdj väör peuters en kleuters. Aojers en groataojers kènne d’r oet väörlaeze en anger spelkes mit de kènjer doon. D’r staon mieë es 170 dialectwäörd in. Die wäörd staon in alfabetvolgorde en allemaol mit ’n kort versje d’rbie op rijm. En ’n sjoan illustratie in kluuer van de handj van Leny Geraedts-Simons. De versjes zeen oorsprònkelik gesjreve door Riky Simons-Julicher oet Zwame, mer zeen väör de Echter versie hersjreve door Lia Jans, Piet Aben en Ton van Wegberg van Veldeke Krink Ech.
Bie de prissentatie zeen de ieëste exemplare van dit beukske door de wèthaojers Marian Bruijsten en Peter Pustjens aangebaoje aan vertegenwoordigers van de peuterspeelzale in Ech-Zöstere. De aanwezige persoane wore te spraeke äöver ’t beukske es hulpmiddel óm mit de kènjer get in dialect te doon. ’t Beukske is vanaaf maondig 18 oktoaber bie de bookhanjel en anger verkouppuntje te koup väör 12,50 euro. De leje van de Veldekekringe höbbe tót de prissentatie de mäögelikheid gehadj bie väörinsjrieving ’n beukske taege aangepasjde pries te reservere. Oetgave van dit beukske taege dae pries is mäögelik door biedrages van versjillendje sponsore, wovan de name op de losse bokelègker in ’t beukske vermeldj staon.
Van ’t beukske “Mien ieëste wäördjes” is ’n versie in Echs en in Remunjs, mer ‘t is ouch mekkelik mit kènjer boete die dialectgebiede te gebroeke.
Op de foto leusj wèthaojer Peter Pustjens ein van de dialectgedichskes väör, daobie nauwlèttendj gevolgdj door wèthaojer Marian Bruijsten-van de Berg, väörzitter VKE Ton van Wegberg en gemèndjeraodslid Bert Hendrickx.
