’t Digitale Echter Dictee van deze maondj zal ’t lèste zeen väör de zomervakantie. Ouch dit dictee bestuitj oet ’n zèstal oetspraoke. Dit nuuj dictee stuitj vanaaf noe oppe website van Veldeke Krink Ech. ’t Is good weer thoes oppe computer te make in óngevieër ’n kerteer.
In augustus zal gein dictee aangebaoje waere. De wèrkgroep van Veldeke zal den aan de handj van de opmerkinge van deilnummers get aanpassinge realisere. Ouch zal vanaaf ’t digitaal dictee van september de scorelies of totaalstandj opnuuj waere opgestèldj. Alle deilnummers beginne den dus weer mit 0 puntje.
Veldeke wiltj mit de maondjelikse digitale dictees ’n alternatief beje väör ‘t dictee in ’t Cultuurhoes. Haopelik is ’n life-dictee ’t volgendj jaor weer mäögelik. Ederein dae wiltj kan de oefening noe thoes make, zónger al te groate spanning en daobie oefene en zien/häör spellingsvaardigheid verbaetere. Daoväör geit m’n nao de website: www.veldekekrinkech.nl. In de balk baovelangs de knóp “dictees” keze en m’n is rechstreeks op de gooj bladzie. Hie staon alle tót noe toe gepubliceerdje dictees; ’t lèste en nuutste stuitj baovenaan, mer leefhöbbers kónne ’n eerder dictee aevel ouch nog make.
Nao keze en aanklikke kömtj m’n in ‘t dictee-formulier. Hie mót ieës ingegaeve waere in welk van de 3 dialecte (van Ech, Zöstere of de Boesj) g’r ’t dictee wiltj sjrieve. En verder of g’r es deilnummer in de scorelies mit de anger deilnummers wiltj waere opgenómme mit naam en/of emailadres.
Verder wèrktj ’t digitaal dictee net es ’t live-dictee: de zinne waere regel väör regel väörgelaeze. De deilnummer typtj d’rónger wie hae of zie dènktj det ’t gesjreve zoe mótte zeen. Door op ’n pielke te drökke kan m’n de väörgelaeze teks versjillendje kieëre opnuuj beloestere. D’r is dus genóg tied. Belangriek is good te loestere en te sjrieve waat väörgelaeze weurtj. Ouch de puntje en laesteikes.
Wae det wiltj, kan zien dictee – nao ’t gemaaktj te höbbe – insture en laote naokieke. Det gebäörtj den automatisch. Väör spelling gebroektj ‘t programma de spelling van Veldeke, zoa es die te vènje is in ’t Brónsgreun Beukske, editie Echt-Susteren en in de Zösterse Kal. Op ’t opgegaeve emailadres krig m’n nao ’n paar daag ’t persuuenlike contróleblaad gestuurdj. En twieë kieër p’r maondj de totaalstandj.
Weer wènse uch väöral plezeer mit ’t nuuj dictee en väöl succes. Klik ónger de foto op de link óm nao ’t dictee te gaon.
