Aanmelje en d’r haer gaon kan nog! Op a.s. zaoterdig 23 mei stuitj ‘t Toon Hermans Theater in Zittert gans in ‘t teike van de Limburgse taal. Veldeke Limburg viertj dae daag ‘t 100-jaorig jubileum mit ’n oetgebrèdje jubileumshow die gratis toegankelik is väör alle dialectleefhöbbers. Det belaoftj ‘ne sjoane daag te waere mit väöl wo oos taal en provincie riek aan is. Interesse? Laes den verder.
Aan ‘t 100-jaorig jubileum geitj natuurlik ‘n rieke historie väöraaf. Wo ‘ne ieëw geleje e paar notabele in Mestreech de basis lagte väör ‘n vereniging ter bevordering van ‘t Limburgs, is Veldeke Limburg óngertösse oetgegreujdj tót ‘n organisatie mit tieën lokale kringe van Noord- tót Zuid-Limburg. Same zètte zie zich al hóngerd jaor op hieël diverse wijze in väör de besjerming en bevordering van oos sjoan streektaal. Bie det sukses weurtj dit jaor op versjillendje menere stilgestange, mit es hoagtepuntj de jubileumshow op zaoterdig 23 mei.
Programma
’t Jubileumprogramma stuitj ónger leiing van presentator Henk Hover en is opgedeildj in twieë daagdeile. Bie ‘t mörgeprogramma (10.30 – 12.30 uur) werpe vief Limburgse taalkènners hun leech op de huidige status van de Limburgse taal. Aansloetendj vuntj d’r ‘n discussie plaats tösse dees specialiste en ‘n aantal Limburgse prominente.
Smiddes (14.00 – 17.00 uur) versjuuftj ‘t accent nao cultuur en amusement. Cabaretier Raymond Clement kaltj de middig op ‘n humoristische en besjouwendje meneer aan ein. Hae sluitj op speelse wieze de brök tösse muzikale optraejes van o.a. Op Geveul, Ton Engels en versjillendje anger Limburgse artieste. De daag weurtj aafgeslaote mit ‘ne gezellige (netwerk)borrel.
Insjrieve
Insjrieve väör ein of beide programma-óngerdeile kèntj nog stieëds want de zaal is groat en liktj centraal in de provincie. De jubileumshow is toegankelik väör alle geïnteresseerdje in de Limburgse taal en cultuur: m’n hooftj dus gein Veldeke-lid te zeen. “Enne…”: insjrieve väör ein of allebei de programma-óngerdeile is natuurlik hieëlemaol väör niks! Insjrieve väör ein of allebei de programma-óngerdeile kèntj via deze link.
