Vanaaf zaoterdig 18 april tót en mit 16 mei toertj Veldeke Limburg kriskras door de provincie óm ‘t 100-jaorig jubileum te viere. Daobie waere tiedes 5 zaoterdigge de 10 versjillendje Veldeke-kringe bezóchtj. Op eder plek vuntj den, ónger ‘t motto ‘Veldeke op Paad’, ’n bienao 2 oer doerendje manifestatie plaats.
Op zaoterdig 9 mei tösse 15 en 17 oer zal dit riejendje podium oppe Plats in Ech staon, te gas bie Veldeke Krink Ech. De artieste oet Ech zeen den Averegs en Josh Mossa. Väördrachte zeen d’r van kènjer van de pas gehaoje declamatiefinales in Zöstere en Sint Joas. Verder zólle es Limburgse muzikante/zengers in Ech mitwèrke Roger Villevoye oet Mestreech en ?. Averegs haetj den dae mörge al ’n optraeje bie de Veldeke Krink Haerle achter de rök, want ’t is ’n estafette, wobie stieëds eine artiest of groep ’t muziekaal stekske doorgeuft.
Mitwèrkendje artieste oet de anger kringe zeen ónger angere Linda Smeets oet Weert, Huub Janssen oet Wanssum, Femke Philippens oet Sumpelveldj, en Roger Borgman oet Mestreech, de band ‘Wie se Oetzuus’ oet Remunj, Paul & Leo en Frits Pelt oet Haerle, Skinnie oet Zittert en Roy Willems oet Sibbe. Waem daovan ouch nog in Ech kömtj optraeje is nog neet bekèndj. De lèste ‘Veldeke op Paad’ manifestatie op 16 mei in Mestreech weurtj aafgeslaote mit ’n optraeje van John Tana.
Bie edere krink weurtj ‘ne speciale jubileumpenning oetgereiktj aan emes dae zich lokaal verdeenstelik haet gemaaktj väör ‘t Limburgs dialect of väör Veldeke. Waem det in Ech-Zöstere zal zeen blif tót 9 mei ’n geheim. En verder zal d’r ‘ne korte kwis plaatsvènje óm de kènnis van ’t Limburgs en van de provincie te achterhaole.
