De jaorvergadering van Veldeke Krink Ech weurtj ouch dit jaor gehaoje in MFC De Pejjerhaof, Houtstraot 7 in Pej, en waal op woonsdig 11 mieërt e.k. óm 20.00 oer.
Den zal de kóffie broen zeen en de vlaaj klaor staon väör oos jaorlikse statutaire algemeine lejevergadering. Nao ’n welkom door väörzitter Jos Wackers zólle de statutair verplichte óngerdeile, zoa-es ’t jaorverslaag en ’t financieel verslaag, väör de pauze aan de orde kómme. Wie de lèste jaore gebroekelik, prissenteertj sikkertaris Magna Bedaf ’n ingespraoke jaorverslaag van 2025 mit sjoan foto’s van oos aktiviteite, gemaaktj door Geert Janssen.
Bie ’t doornumme van de financieel stökke zal penningmeister Jeanne Vaessen toelichting gaeve. Aansloetendj zal de kaskemissie verslaag oetbrènge van hun bevènjinge, wonao de beneuming van de nuuj kascontrolekemissie aan de bäört is. Daoväör weurtj 1 nuuj lid gevraogdj. De traditie óm de contributie neet te verhuuege zulle w’r dit jaor ouch in ieëre haoje.
Den gaon w’r verder mit ’t aaftraeje en beneume van de bestuursleje. Dit jaor is Ton van Wegberg, aaftraejend en neet herkeesbaar! Hiebie ’ne dringendje oproop. Es g’r affiniteit höbtj mit pr-zake en g’r wiltj euch lidmaatsjap van Veldeke Ech oetbreije mit ‘t bestuurslidmaatsjap, numtj ‘ns vrieblievendj kóntak op mit Ton of ein van de anger bestuursleje. Den kènne w’r óm de taofel gaon zitte óm ‘ns te bespraeke waat dees functie inhöltj en wie geer dao tegenaan kiektj! Moch g’r bestuurslid wille waere, of witj g’r emes, den kènjt g’r det bekèndj make bie de secretaris t/m 25 februari 2025. Dao kieke w’r haer oet!
Nao de pauze volgtj ’n muzikaal invölling, wonao aafsloete van deze aovendj.
VKE woor aafgeloupe jaor genomineerdj väör de Cultuurpries.
Väörzitter Jos Wackers en bestuurslid Yvonne Smeets bekieke de daobie óntvange oorkonde.