Ouch in 2026 zal in de Bieb door vriewlligers van Veldeke in ’t Limburgs waere väörgelaeze aan jóng kènjer. Kómmendje maondig, 19 januari zal det weer gebäöre van 16 -16.30 oer in de nuje bibliotheek aan de Bovenstestraot 9 in Ech.
Vanaaf 16.00 oer zeen peuters en kleuters tösse 3 en 6 jaor, same mit aojers of groataojers of anger oppassers, van herte welkom óm te kómme loestere nao ’n verhaol. Ze loestere vol aandach en bekieke en bespraeke same de sjoan plaetjes in ‘t book. Soms höbbe de väörlaezers van Veldeke dao nog ’n kluuerplaat of knutselwerkske bie. ’t Is gratis en väör ederein: welkom!
Väörlaeze is ’n belangrieke activiteit väör de taalóntwikkeling van jóng kènjer, ouch es det in ’t plat gebäörtj. Van jóngs aaf aan regelmaotig väörlaeze is belangriek, maaktj kènjer vertroewdj mit taal en bevordertj det ze zelf gaon laeze wannieë ze dao aan toe zeen. Extra stimulerendj bie jóng kènjer kan zeen es det gedaon weurtj in ’n vertroewde en herkènbare taal, zoa-es ’t Echter of anger dialek, zeker es det ouch thoes en bie opa en oma gespraoke weurtj. De angs det zie den gein good Nederlands gaon spraeke is óngegróndj, bliektj oet óngerzeuk. Mit mieë tale óm te kènne gaon, bliektj zelfs positief (L. Cornips e.a.)
Óm die raeje is Veldeke Krink Ech mit ‘ne groep vriewilligers in 2022 begósj mit ’n maondjeliks väörlaeshalfuurke. Dit in samewèrking mit de bibliotheek, die in ’t kader van hun project “Boekenschatkist” al èns in de maondj ’n väörlaeshalfuurke in Nederlands hawwe. M’n hoof gein lid te zeen van Veldeke of van de Bieb óm deil te numme. ’t Limburgs väörlaeze is op edere 3e maondig van 16.00 tót 16.30 oer. Mit oetzunjering van speciaal daag.