Degene ónger uch die väörig jaor zeen mitgewaes mit ’t jaorliks oetstepke herinnere ’t zich mesjien nog. Bie ’t bezeuk aan ’t Museum in ’t Ursulinenconvent in Eysden, kome w’r op zeker momènt bie ’n oetgebrèdje oetstalling van ’n Provencaals dörp in kerstied: de beroemde “Santons”, mit taferele oet de 18e en 19e ieëw in die streek. De prissentatie woor in ’t museum gebrach door Elly en Sjef Senden oet Brunssum. Resultaat van hun in mieë es 20 jaor verzameldje collectie van Santons en attribute die daobie huuere. Zoa weurtj ‘ne kersstal al gaw ’n gans kersdörp mit allerlei taferele, die m’n zich daobie kan bedènke. ’t Waas indrökwèkkendj en sjoan óm te zeen!
Korte tied daonao höbbe weer mit ‘t echtpaar ’n aafspraok kènne make väör ‘n prissentatie äöver en van dees Santons op oze Veldeke-aovendj in november. Det zal get bezunjers waere. Natuurlik kan neet zo’n oetgebrèdje oetstalling gemaaktj waere es in ’t Museum, mer Elly en Sjef höbbe toegezag ’n aantal beeldje mit te numme en daovan ’n oetstalling te make, aan de handj wovan zie äöver dees traditie in dees landjstreek in Zuid-Frankriek kènne vertèlle en wo de aanwezige van kortbie nao kènne kieke. De Provence bie VKE dus.
’n Traditie die is óntstange oet ’n saort wedstried – ouch mit de aangrenzendje Italiaanse bure – väör de sjoonste kersstal mit Kersmis. Wie in de tied van Napoleon de kirke geslaote waerdje, verplaatsdje dit volksgebroek zich nao de minse thoes. Van alles waat ze besjikbaar hawwe, waerdje figuree en taferele gemaaktj: de Santons of kleine heilige. Later, nao de tied van Napoleon, is dit weer verder opgepaktj en oetgebrèdj tót komplete landjsjappe mit allerlei scenes oet ’t dörpslaeve oet daen tied en kunstig oetgeveurdje en aangeklèdje figure.
Det alles vèltj te bekieke en es informatie oet de ieëste handj te beloestere op woonsdig 15 november vanaaf 20.00 oer in de Pejjerhaof. Väör leje is deze aovendj gratis. Introducees/neet leje zeen ouch welkom, mer zie betale 3 euro p.p.. Weer vènje det terech, want leje betale hun jaorlikse contributie aan Veldeke.
