Net wie bie de äöpening van ’t nuuj winkelcentrum in Ech in 2012 is kortgeleje ouch in Pej ’n aantal dialectspreuketegels gelag. Veldeke Krink Ech haetj ouch noe ‘ne route-folder samegestèldj óm langs al die tegels te loupe, mit oetlèk van de beteikenis van die spreuke. Dae folder is oetgedeildj bie de äöpening van ’t nuje centrum op 13 oktoaber j.l. mer noe ouch nog aaf te haole bie AH-Linders supermert. De route kan nog altied geloupe waere.
Momenteel ligke in Pej nog neet zoaväöl tegels. Mer äöver die d’r noe waal ligke, geuftj dae folder informatie. De tegels in Pej betreffe soms spreuke, mer meis aanduidinge van de plek of ómgaeving wo dae tegel liktj. Es in de kómmendje jaore de vernujing van straote of stoepe in Pej verder geitj, kènne w’r dae folder verder aanvölle. De tegelwanjeling in Pej tuuentj väörop de tegel ”’t Greun van ’t graas” dae al in 2021 bie ’t begin van de werkzaamheje is gelag bie de speeltuin op ’t Hènge. De wanjeling begintj bie ‘t “Vastelaovesmonemènt”, bie de plek wo tót väör kort ’t Patronaat stóng.
