M’n zoew kènne konkludere det de jónger deilnummers ’t twieëdje Echter Dictee höbbe gewónne. Marc Jessen van ’t Hènge kós mit volges de jury ’t minste aantal fout gesjreve wäörd de wisseltrofee mit nao hoes numme. De 2e en 3e plaats wore respektievelik väör Magna Bedaf van St. Joas en Annet Creemers oet Pej.
’t Echter Dictee kós dit jaor weer in ’t Cultuurhoes aan de Plats waere gehaoje. Det waerdje ‘ne spannendje – ’t woor muuskesstil tiedes ’t sjrieve – mer tegeliek sfeervolle middig. Zoawaal de wedstrieddeilnummers, die hun dictee door de jury lete naokieke en beoordeile, es de deinummers “väör spek en boane” deje hun bès óm ’n good resultaat te bereike. Bie sommige woor ’t streve ’t in eder geval baeter te doon den bie ’t ieëste Echter Dictee in 2019, wo ze ouch aan hawwe deilgenómme.
Thema van dit dictee wore ’n drietal aoj Echter sagen en legendes. Det leverdje ’n paar sjoan wäörd op wie “spönnegewaef”, “dieëmerdje” en “häörepaerd”. Awd voetbaltrainer Sef Vergoossen dae de zinne väöraaf introduceerdje en väörloos, deej de väörspelling det hae zelf dit dictee neet mit minder es 25 foute zoew kènne make. De wènnieërs zote dao ’n stök ónger!
