De jaorvergadering 2018 van Veldeke Krink Ech weurtj gehaoje in de Pejjerhaof, Houtstraot 7 in Pej-Ech, op woonsdig 21 februari a.s. óm 20.00 oer, mit bie bönnekóms ’n tas kóffie en ’n stök vlaai.
Ich nuuedig uch van herte oet hie bie te zeen. In dees jaorvergadering kieke w’r trök op ’n succesvol 40-jaorig jubileumjaor. Ouch noe weer mit de fotopresentatie van de versjillendje activiteite van dit jaor, verzörgdj door Geert Janssen.
Väör de pauze höbbe w’r de óngerdeile gepland, die statutair verplich zeen. W’r perbere ’t väörlaeze en bespraeke van ’t jaorverslaag en ’t financieel verslaag kórt en aanspraekendj te haoje. Det löktj, ómdet de verslage van alle aktiviteite al bie uch bekèndj zeen via oos Veldeke-bekèt en dus neet herhaoldj hove te waere. De kascontrole commissie brungtj verslaag oet van hun bevènjinge, bie ’t doornumme van de stökke en daonao kömptj de beneuming van de nuuj kascontrolecommissie. ’t Väörstèl van ’t bestuur is, óm de contributie neet te verhuuege, dus det puntj zal waal gein perbleme oplevere. Den volgtj ’t beneume van nuuj bestuursleje. Volges ’t ruuester van aaftraeje zeen Piet Aben en Riet Bougie aan de bäört. Piet stèltj zich herkiesbaar. Riet is neet herkiesbaar es bestuurslid en w’r zólle in dees jaorvergadering aafsjied van Riet numme. Riet woor vanaaf 1997 twieëdje penningmeister van VKE en vanaaf ’t äöverlieje van Harry Linssen, ieëste penningmeister. Die lang bestuursperiode wiltj ’t noe aafsloete. Riet blif waal lid van VKE. Leje van Veldeke kènne bestuurskandidate bekèndj make bie de sikkertaris t/m 31 januari 2018 of zichzelf aangaeve es bestuurslid. Dao zoewe w’r erg blie mit zeen. Nao de bestuursverkezing is d’r tied väör de pauze mit de fotopresentatie van Geert.
Nao de pauze kieke w’r väöroet nao de inhoud van ’t nuuj programma 2018 en staon w’r get langer stil bie ’t aafsjeid van Riet Bougie. De ómliestendje meziek weurtj verzörgdj door Audrey Janssen mit begeleiding van Jos van Pol.
