Kómmendj waekènj, op Paosmaondig 6 april, weurtj de ieëste van twieë regiofinales van de Veldeke Declamatiewedstried gehaoje. Dees is väör de deilnummers van de sjoale oet groat Ech, wo-ónger de Boesj, de Deelgaard/Maria Hoop, Pej, Sint Joas en Ech.
Op de versjillendje basissjoale in Ech-Zöstere is mit de lieërlinge de väörbereiding hievan al eerder op gang gekómme. Te beginne mit ’t oetzeuke van ’n passendj dialectgedich en daonao ’t oefene thoes en op sjoal väördrage väör de anger kènjer in de klas.
De declamatiewedstried weurtj intösse in Ech al väör de 23e en in Zöstere veur de 17e kieër gehaoje en zal ouch dit jaor weer aafgeslaote waere mit 2 regiofinales en ‘n Limburgse finale. Sjoale kóste väör eder van de drie categorieë (groep 1,2,3 en 4; groep 5 en 6 en groep 7 en 8) twieë kènjer door laote gaon nao hun finale.
Paosmaondig 6 april te beginne mit de regiofinale Ech e.o. Die weurtj dit jaor gehaoje in ‘t Patronaat te Sint Joas vanaaf 13.30 uur. Det belaoftj weer ‘n gezellige, mer ouch spannendje bie-einkóms te waere , want ’n speciaal hieväör samegestèldje jury zal den de väördrachte bekieke en beloestere en daonao beoordeile. Alle deilnummers kómme vervolges oppe foto en kriege ’n oorkonde. De wènnieërs moge doorgaon nao de Limburgse finale, die dit jaor in Wieërt zal waere gehaoje.
In Zöstere zal veur de deilnummers/sjoale oet groat Zöstere – det is ouch veur de Nuujsjtadt – de finale gehaoje waere op zóndigmörge 12 april óm 10.00 oer in MFC de Hermeniezaal aan de Feurthstraot.
Bie allebei de bie-einkómste zeen de deilnummers den welkom, same mit aojers/verzörgers, eventueel groataojers en anger supporters wie klasgenootjes. Verder informatie betreffendje de declamatiewedstried is te kriege bie de coördinator cultuur van de eige sjoal of rechstreeks bie de coördinator van Veldeke Krink Echt, Ruud Roumen, tel. 06 55 08 13 11 . Veldeke wunsj alvas alle deinummers ’n gooj väörbereiding en ’n risseltaat óm gruuets op te kènne zeen.
