’t Limburgs haet in de nuje bibliotheek van Ech-Zöstere (“de Bieb”) aan de Bäövesstestraot 9 in Ech ’n oetdrökkelike plaats gekrege. Det is neet op de lèste plaats te danke aan börgemeister Hessels, dae de streektaal altied al ’n werm hert haet toegekèndj, en inspanninge van Veldeke Krink Ech. Bie zien aafsjeid es väörzitter van de VEGAL en de commissie van aandeilhaojers van Enexis moogdje hae ein ter besjikking gestèldj bedraag bestömme väör ’n good doel. Die zeen d’r natuurlik genóg. De börgemeister koos d’rväör de cheque te sjènke aan Veldeke Krink Ech väör de planne óm in de nuje Bieb in samewèrking mit de Domeinen plaats in te rume väör oos dialect. Bie de äöpening van de Bieb waerdje de cheque aangebaoje aan Jos Wackers, de väörzitter van VKE.
De plaats väör ’t Limburgs in de Bieb bestuitj o.a. oet de laestaofel, geplaatsj taege de wandj mit ‘ne plattegróndj van Ech-Zöstere en ’n gedich in ’t plat. Verder is d’r ’n apaarte plek väör Limburgse beuk, d.w.z in ’t Limburgs gesjreve of äöver Limburg en de Limburgse taal. Dees beuk zeen väörluipig allei ter inzage, mer sommige kriege op d’n doer ouch ’n plaats in ‘t oetlieënsysteem. In de nuje Bieb is verder ’n gezellige aafdeiling gekómme väör kènjer en mit name ’ne laeshook wo ouch ’t maondjeliks väörlaeze in ’t Limburgs kan plaatsvènje. Mesjien kan in de toekóms ouch de kursus “Leef Limburgs” in de Bieb waere gegaeve.
