De “Susterense Declamatie Finale” die aafgeloupe zóndig in MFC De Hermeniezaal waerdje gehaoje, waas ouch ’n groat succes. Dao wore 28 deilnummers aafgevaardigdj door hun eige sjoal. Óm dees kieër mit ‘ne volle zaal mit “fans”: aojers, opa’s en oma’s, breurkes, zösterkes, juffe van sjoal, vrunj en zoamer belangstèllendje hun gedich nog èns väör te drage. Det maakdje ’t vanaaf ’t begin sfeervol en spannendj.
Nao de inleidendje oetlèk van Ruud Roumen, de väörzitter van de Wirkgroep Declamatie van Veldeke Krink Ech, en ’t väörstèlle van prissentator Robert Buckx en de leje van de jury, waerdje al gaw begós en kome de deilnummers op ’t podium; ouch noe wie gebroekelik in 3 categorieë.
“Alle deilnummers de veerde plaats”, zag de väörzitter van de jury nao de wedstried. Daoróm krig ederein ’n oorkonde. ’t Is det de deilname aan de Limburgse finale gelimiteerdj is. (Want anges zoe die finale waal ‘ne ganse daag in beslaag numme!) en det daoróm ’n paar kènjer per categorie mótte waere aangeweze, die volges de jury ’t allerbèste höbbe väörgedrage. Die kènjer wore:
Oet de groepe 1-2-3-4:
1. Flore Joosten – gr. 1 – Vlinderke – Bs Int Park
2. Dex Hamers – gr. 3 – De kat van de bure – OBS de Springdonk
3. Lizz Ermans – gr. 4 – Ich höb… – OBS de Springdonk
Oet de groepe 5-6:
1. Lauren Leurs – gr. 5/6 – Kakeltante – Bs Int Park
2. Lise Jeurissen – gr. 5/6 – Ich op sjoal* – Bs Int Park
3. Zoë Rours – gr. 5 – Mien mam – OBS de Springdonk
Oet de groepe 7-8:
1. Sophie Rours – gr. 8 – Greuëtsj det ich van Zöstere bun* – OBS de Springdonk
2. Lauren Nagelmaeker – gr. 7 – Mien eigen taaltje – KC de Eik
3. Kyara Stevens – gr. 7 – De goje awwe tied* – Bs Int Par
De gedichte mit * wore door hun (groat-)aojers of bekèndje zelf gemaaktj. Ouch dit jaor bleek weer väöl belangstèlling väör de declamatiewedstried. VKE danktj hieväör in bezunjer de sjoale die dees activiteit weer mit opgepaktj höbbe. Nao det allemaol gezag te höbbe waerdje de prieze oetgereiktj aan waem ‘n 1e, 2e of 3e plaats haw gehaoldj en alle angere mit hun 4e plaats ’n sjoan oorkonde. De deilnummers mit ‘n 1e of 2e plaats kónne nog mitdoon aan de Limburgse finale op zaoterdigmiddig 6 juni in Wieërt.
