Kort nao ’t versjiene van ’t beukske “Mien ieëste wäördjes” höbbe de beide kringe weer get nuuts: ’n memoryspel in ’t Echs en in ’t Remunjs. De samewèrking tösse de beide kringe haet ’t mäögelik gemaaktj bie de spelle-oetgaever Ravensburg ’n gezamelike opdrach te plaatse, wodoor de realisering mäögelik is. Het Echter memoryspel (en ’t Remunsj ouch) is oetgeveurdj in 2 x 36 gekluuerdje kaertjes mit aafbeeldinge oet ’t beukske en de wäördjes d’rbie. De oetveuring is sjoan verzörgdj op stevige kaertjes in ’n blikke doas: ’n spel óm cadeau te gaeve! En mit väöl mäögelikheje óm mit kènjer (mer ouch volwassene!) bezig te zeen mit oos Limburgse taal.
Leje van Veldeke Krink Ech kènne nog tót 15 november a.s. gebroek make van de regeling det zie 1 (=ein) ex. van det spel kènne reservere väör de speciale pries van 14,00 euro. Bie de Krink Ech kan det door det bedraag äöver te make op ’t raekeningnummer NL 65 RABO 0138 6319 64 ten name van Veldeke Kring Echt ónger vermelding van ‘t lidnummer. Betaaldj geldt es gereserveerdj en ’t spel kan m’n aafhaole bie ein van de leje van ’t dageliks bestuur. Nao 15 november geldtj äöveral en väör ederein de vasgestèldje verkouppries in de winkels.
Realiseertj uch det dit spel ’n unieke oetgave betruf. ‘n Kwalitatief en verzörgdje oetgave die in de spellekas of bie ‘ne verzamelieër neet moog óntbraeke. Óndanks de oplage-korting blif ‘t ’n duur oetgave. Mäögelik gemaaktj door biedrages van de Raod väör ’t Limburgs, ’t stimuleringsfonds van Veldeke Limburg, de Remunse Stichting 1880, de gemèndje Ech-Zöstere. Daodoor kan ’t spel det kospries € 22,50 zoe mótte zeen, in de winkel te koup zeen väör 17,75.
