Wie aangekondigdj is bie de oetgestèldje jaorvergadering van Veldeke Krink Ech aafsjied genómme van väörzitter Ton van Wegberg. Daomit geitj de Krink mit ingang van ’n kómmendje jaor zónger väörzitter verder, want ‘ne opvolger is d’r nog neet. Ton vónj det ’t tied is väör ‘ne opvolger, leefs ’n nuuj, get jónger krach die mit frisse ideeë en väöl energie aan de slaag wiltj gaon. Dao bliftj ’t bestuur de kómmendje tied nao oetkieke.
Veldeke is noe waal ‘ne ieëreväörzitter rieker. Bie zien aaftraeje es väörzitter is Ton door de vergadering beneumdj es ieëre-väörzitter. Es herinnering kreeg hae o.a. ’n beeldje van Hendric van Veldeke aangebaoje. De lèste maondje van dit jaor zal hae es väörzitter nog ’n aantal zake aafhanjele. Ouch daonao bliftj hae actief bönne ’t bestuur.
