Declamaties in Echt mit gooj resultate.
De ieëste regiofinale van de Veldeke declamatiewedstried 2024 woor weer ‘ne gezellige femieliemiddig. Väöl aojers, groataojers en angere “aanhang” woor nao “de Pejjerhaof” gekómme óm de wedstried mit te make en de deilnummers te ongersteune. In totaal 39 finaliste van 5 deilnummendje basissjoale.
De wirkgroep declamatie van VKE is blie mit dees groate deilname. Det is het gevolg d’rvan det basissjoale de declamatie in hun programma opnumme en mieë kènjer mit wille doon. Want tèlle w’r bie de hiebaove geneumdje finaliste namelik ouch nog de kènjer die bie de selectie op hun eige sjoal de regiofinale (nog) neet gehaoldj höbbe, den kömme w’r aan zo’n 80-110 deilnummers. Sjoale kónne in eder categorie mer 2-3 deilnummers aafvaardige, anges doertj zo’n finale te lang. In de volle zaal woor ein gooj, mer ouch spannendje sfeer. De kènjer die op hun eige sjoal door de selectie wore gekome, kóste zich noe maete mit kènjer van de anger basissjoale in “groat Ech”.
De äöpening mit ‘ne fórse slaag op de gong waerdje gedaon door Kenza van Bao Keuningshäöfke, de jóngste deilnumster oet groep 1. Presentatrice Patricia Beyer probeerdje alle deilnummers stieëds mit ’n kort präötje väöraaf op hun gemaak te stèlle en hun enthousiasme ‘n kans te gaeve. De driekoppige jury haw es taak te bepaole waem ’t gekaoze gedich ’t bèste haw väörgedrage. Daobie tèltj op de ieëste plaats de meneer van väördrage: oetspraok, oetbeeldjing in gebare en mimiek. Gein gemekkelike taak deze middig. De oetslaag van de finale Echt e.o. woor:
Categorie groepen 1, 2, 3 en 4
1. Teun Wolters, BS Angela, Echt | Gedict: “Miene druim” *
2. Josine Kanters, BS de Violier, Echt | Gedict: Alfabet
3. Milan Sevriens, BS Angela, Echt | Gedich: “Knienke” *
en Noiud Op het Veld, BS Angela, Echt | Gedich: “Stróndj ane kóntj”
Categorie groepen 5 en 6
1. Bo Swinkels, BS Patricius, Pey | Gedich: “Zeivere en zeure”
2. Larena Coenen, BS Keuningshöfke Koningsbosch | Gedich: “Kriebeltje” *
3. Zef Gerelings, BS Angela, Echt | Gedich: “De nar” *
Categorie groepen 7 en 8
1. Thomas Laumen, BS Patricius, Pey | Gedich: “‘ne Sioane daag” *
2. Suze Golsteijn, BS Patricius, Pey | Gedich: “Eine knóp”
3. Jade Bus, BS Angela, Echt | Gedich: “Miene druim”
* zelf gemaaktj gedich
Alle anger deilnummers ‘n dik verdeendje 4e plaats volges de jury-väörzitter. En ‘n sjoan oorkonde es herinnering. Väör de nummers 1, 2 en 3 waas daonaeve ‘ne pries. Werkgroepväörzitter Ruud Roumen kòs trökkieke op ’n geslaagdje ieëste finale. Volgendje waek, op zóndigmörge 21 april, zal óm 10.00 oer de regiofinale in Zöstere waere gehaoje in MFC “de Harmoniezaal”.
Wènnieërs groep 1-2-3-4
Wènnieërs groep 5-6
Wènnieërs groep 7-8
Deilnummers groep 1-2-3-4
Deilnummers groep 5-6
Deilnummers groep 7-8
