Piet Aben haet in de good gevölde zaal van ’t gemèndjehoes de Cultuurpries 2016 van de gemèndje Ech-Zöstere gekrege, väör ziene inzèt op het gebied van meziek, de herdènkinge die verbandj haoje mit d’n oorlog en zien inspanninge väör ’t dialect. D’r wore 7 genomineerdje persoane of groepe väörgedrage väör deze jaorlikse pries, dae noe väör de dördje kieër waerdje oetgereiktj door wèthaojer Peter Pustjens. Organisatie en selectie wore in henj van de Klankbordgroep Cultuur.
Es bestuurlid van Veldeke Krink Ech is Piet Aben mit name verantwaordelik väör de jaorlikse declamatiewedstried väör de jeug van de basissjoale en väör de cursus “laeze en sjrieve in ’t Limburgs”, dit jaor väör de 10e kieër!
Piet heel ’n sjoan en bewaoge toespraok, nao óntvangs van ’t beeldje (“’t Zwingelke”, gemaaktj door kunstenieër Lei Hannen) en de sierlike oorkonde (gemaaktj door René Vroomen).
