Altied henjig zo’n BGB, editie Ech-Zöstere bie de handj te höbbe. Dees sjriefhulp kan zeker van pas kómme es g’r kómmendj naojaor en wèntjer weer èns aan ’t sjrieve slaontj: gedichte, verhäölkes of zoamer alledaagse dènger. ’n Boadsjappelieske in ’t plat hulptj ouch es m’n in de winkel stuitj!
Mer zótj g’r gedichte of verhaole gaon sjrieve, dènk den ouch aan Veldeke. De redaksie van ’t Veldeke Bekèt óntvungtj gaer eur kreatieve vruchte van dees inspanninge óm ze – in äöverlèk mit uch – verder te brènge en eventueel te plaatse in oos kwartaalblaad of oppe website. Ein Brónsgreun Beukske kan bie det sjrieve ’n welkome sjriefhulp zeen, naeve computer of laptop of in de kas. Nog de res van dit jaor ligke ze – zoa lang es väörraod is – te koup väór de zwaor gesubsidieerdje pries van 2,50 euro bie oos verkouppuntje. En g’r sjriftj den in de vasgestéldje “Veldekespelling 2003”, wodoor good laesbaar ouch boete oos eige gemèndje.
