Väör de lieërlinge van de basissjoale organiseertj VKE dit jaor weer de declamatiewedstried, wobie de jónges en maedjes ’n zelf gekaoze gedich kènne väördrage. Twieë jaor achterein is deze wedstried door corona neet kènne doorgaon. Noe weer waal!
Alle basissjoale höbbe intösse van de Wirkgroep Declamatie de noodzakelike materiale gekrege, wobie ónger angere ’n book mit gedichte wo-oet de kènjer d’r eventueel ein kènne keze. De gedichte en dus ouch de wedstried is weer ingedeildj in drie categorieë: groep 3 en 4, groep 5 en 6, en groep 7 en 8 van de basissjoal. Van eder categorie zeen 5 gedichte besjikbaar.
Väör es ’n sjoal d’r väör keusj óm dit jaor neet es sjoal mit te doon kènne aojers zelf ’t initiatief numme es hun kèndj gaer mit zoe doon. Kènjer en hun (groat-)aojers kènne eventueel ouch zelf ’n gedich make. Det mót den waal voldoon aan de criteria van de anger gedichte in ‘t book.
’t Oefene mótte de kènjer ouch zelf doon. Det begintj mit ’t gedich van boete lieëre. En vervolges ’t good väördrage, eventueel mit hulp van thoes of soms ouch op sjoal. De väördrachte waere bie de finales beoordeildj door ’n jury. Daobie tèltj de kwaliteit van de väördrach: begriepe van ’t gedich, dudelike oetspraok, passendj stömgebroek, passendje bewaeginge, enz. Väörwerpe kènne de declamatie óngersteune, mer zólle neet bepalendj zeen.
De Regio Finales zeen dit jaor:
1) väör Groat Ech: de 19e kieër, op vriedig 8 april a.s. in de Pejjerhaof, Houtstraot 7 in Pej, vanaaf 19.00 oer.
2) väör Groat Zöstere: de 13e kieër, op zóndigmörge 10 april vanaaf 10.00 oer in de Hermeniezaal in Zöstere.
Informatie äöver de declamatiewedstried bij de coördinator cultuur van de basissjoal of rechstreeks bie Veldeke Krink Ech, tel. 0475-482146.
