De “Echter Declamatie Finale” op Paosmaondig in ‘t ’t Patronaat’ in St. Joas woor ’n groat succes. De 31 deilnummers – allemaol al eerder geselecteerdj op hun eige sjoal of in de Bieb – kóste hie hun väördrach nog èns laote zeen op ’n groat podium mit es publiek väörnamelik hun eige “fans”: aojers, opa’s en oma’s, breurkes, zösterkes, vrunj en zoamer belangstèllendje. De prachtige zaal van ’t Patronaat zoot good bezatj!
Nao de inleidendje oetlèk van Ruud Roumen, de väörzitter van de Wirkgroep Declamatie van Veldeke Krink Ech, en van prissentator Patricia Beyer, waerdje al gaw begósj. En ’n gooj 2 oer later woor de oetslaag bekèndj:
Oet de groepe 1-2-3-4:
1. Pie Gerelings – gr. 3 – Limburgse vlaai* – Bs Angela
2. Ilvy van Herten – gr. 4 – Mien Moortje – Bs Patricius
3. Guusje Geelen – gr. 3 – Vekansie – Bs Angela
Oet de groepe 5-6:
1. Teun Wolters – gr. 6 – Ich haoj van game* – Bs Angela
2. Noud Op het Veld – gr. 6 – Oos sjieke taal* – Bs Angela
3. Josine Kanters – gr. 5 – Miene verjaordaag* – Bs De Violier
Oet de groepe 7-8:
1. Bo Swinkels – gr. 8 – Oppe dörpel* – Bs Patricius
2. Sem Wilms – gr. 7 – Op jach – Bs Patricius
3. Luuk van Montfort – gr. 7 – Vrieheid* – Bs Angela
De gedichte mit * wore door hun (groat-)aojers of bekèndje zelf gemaaktj. Det wore d’r dit jaor väöl, ouch bie de deilnummers die op de veerdje plaats zeen gekómme. Óngerwerp of thema van die gedichte woor gans gevarieerdj, van jeugprins(es) zeen, lekker laeze in ’n book enz. De jury goof aan det ouch bie die gedichte väördrachte wore die ’n hoag aantal puntje hawwe gehaoldj, mer oeteindelik toch neet door kóste, ómdet de deilname aan de Limburgse finale gelimiteerdj is. (Anges zoe die finale waal ‘ne ganse daag in beslaag numme!). Det geuftj waal aan det de kwaliteit van gedichte en väördrachte toenumtj en det d’r nog stieëds gooj belangstèlling is väör de declamatiewedstried. VKE danktj hieväör de sjoale die dees activiteit weer mit opgepaktj höbbe.
Nao det allemaol gezag te höbbe waerdje de prieze oetgereiktj aan waem ‘n 1e, 2e of 3e plaats haw gehaoldj en alle angere mit hun 4e plaats ’n sjoan oorkonde. De deilnummers mit ‘n 1e of 2e plaats kónne nog mitdoon aan de Limburgse finale op zaoterdigmiddig 6 juni in Wieërt.
