Net wie eerder jaore gaon w’r op de vriedig väör Kersmis äöver in de sfeer van de tied.
Op vriedig 19 december óm 19 oer is ederein – lid of neet lid van Veldeke – welkom óm deil te numme aan de dialekmès in de parochiekirk van Pej. VKE zörgtj väör de teksbeukskes en de gezange, zoadet ederein mit kan doon. Pater Frans Tholen zal in de deens väörgaon. Muzikaal begeleiding is d’r van ’ne spelersgroep van de fanfaar St. Joseph. De aafgeloupe jaore is de belangstèlling väör dees dialekmès gegreujdj en wore d’r eder jaor get mieë bezeukers. Oet de reaksies bleek det m’n nao aafloup erg kontent woor. Dus: bie deze oetgenuuedigdj óm weer of ouch te kómme. Doontj uch werm aan, want ’t kan kawd zeen in de kirk.
De kerstviering VKE in 2024
Leje van de veldekekrink, die zich daoväör höbbe aangemeldj, gaon nao dees deenst nao de zaal van de Pejjerhaof, dae in fieëstelike kerstsfeer zal zeen aangeklèdj. Ouch hie zal ’ne spelersgroep van de fanfaar väör de muzikaal ómliesting zörge en d’r höbbe zich ouch get leje aangemeldj mit ’n väórdrach. W’r zörge väör get te drinke en te aete en genóg tied óm mit ein te vertèlle. Wie väörig jaor sloete w’r aaf mit ’n klein laoterie. Óm uterlik èlf oer sloete w’r aaf.
Aanmelje kan mit de betaling tót 10 december; kiek hieväör in ’t väörige Veldeke Bekèt.
