In de waek van de jaorlikse “Dierendag” op 4 oktoaber a.s. kömtj weer ‘n nuuj beukske oet van Floortje; det is ‘t 3e van dit jaor! Nao Vastelaovendj en de Miljoenelien geitj ’t óngernummendje Floortje noe mit opa op bezeuk in ‘ne groate deretuin en zuutj dao allerlei dere in hun natuurlike ómgaeving. ’t Beukske is weer gesjreve door Astrid Frusch en geïllustreerdj mit sjoan teikeninge door Melanie Frissen. De Ech-Zösterse versie in het Echter dialek is hertaaldj door Piet Aben en Ton van Wegberg. Want de Floortje-beuk – ’n aanwèns van (väör-)laesbeukskes väör jóng kènjer – kómme oet in versjillendje Limburgse dialekte, dök dao-in ómgezatj door Veldekeminse. Dit nuuj beukske weurtj op 24 sept. a.s. geprissenteertj in ’t Echter derepark “Hertespaor”.
Prissentatie in dierepark “’t Hertenspoor”
In ’t Echs noe dus “Floortje in de deretuin”. Óm die raeje höbbe w’r in samespraok mit minse van de deretuin “Hertespaor”, gelaege in Ech langs ’t spaor, aafgespraoke dit beukske in dit Echter derepark te prissentere. Det zal gebäöre op woonsdigmiddig 24 september a.s. óm 14.00 oer. Ederein is den in ’t derepark welkom en w’r verwachte aojers, groataojers, kènjer en kleinkènjer. ’t Ieëste eksemplaar weurtj oetgereiktj aan emes van ’t park.
Natuurlik is “Hertespaor” geine ech groate deretuin wie in ’t Floortje-book, mer kan aevegood model staon väör de aandach väör dere, waat de sjriefster haet wille bereike. En óm jóng kènjer te laote kènnis make mit versjillendje dere in versjillendje gebiede op de waereld. In oerwoud, steppe, mer ouch in Limburg!
’t Beukske “Floortje in de deretuin” is vanaaf Deredaag 2025 te koup bie de Veldeke-verkouppuntje, zoa lang es väörraod is.