Dialectkènner Jan Sjure geitj op de Veldeke-aovendj op woondig 16 oktoaber a.s. in de Pejjerhaof mit ós nag ‘ns trök nao waat allewiel de basissjoeël hètj, trök nao ós leger sjoeël. V’r gaon trök nao d’n tied det v’r ’t laeze en sjrieve krege aangelieërdj, trök nao ‘aa-p, n-oo-t en m-ie-s’, trök nao wie letters wäörd wórte. Trök nao wie v’r in ’n fractie van ’n seconde ’n godwètjwielank waord ónbewusj kóste laeze zónger ós drök te make euver oet wieväöl letters en in welke volgorde det waord woor opgeboewdj.
Sommige minse zólle Jan Sjure wellich nog kènne oet de waekelikse rubriek “Druimentaere”, die get jaore geleje nog in de Limburger te laeze woor. Weinige zólle wete det hae van beroep/opleiding medicus is, mer det op zekere laeftied de Limburgse taal en mit name ’t Lins de baovehandj haet gekrege. In zien veurdrach ‘Limburgs: wie sjriefs se det?’ probeertj Jan Sjure ós nao te laote dinke en te óntraofele woróm bekans iddere Limburger zoeë good es foutloeës Nederlands, Ingels, Frans en Duits sjrief, mer dae eigeste Limburger nag ummer meujte haet óm zien modertaal provinciewied uniform op papier te kriege. Wiezoeë kómme v’r in ’n sjtraol van tieën kilomaeter róntjelóm os haer plaatsnaambördjes taege mit ‘Oeëzje’, Thoear en ‘Sint Joas’? Wiezoeë ligke loestere en kieke zoeë wied oetein? Good aafgesjtèldje oeëre huuëre in ’t Limburgs óngevieër 30 klankvariante; wiezoeë höbbe v’r ’n sjpellinggids die veur die 30 klanke mieër es drie keer zoeëväöl meugelikheje guf óm die op papier te kriege.
Jan Sjure luuëtj in zien laezing op woonsdig 16 oktoaber vanaaf 20.00 oer in de Pejjerhaof, Houtstraot 7 in Pej, op ’n sjpeelse meneer zeen det ‘sjpeLLing’ neet veur nieks mit ‘döbbel-L’ wurtj gesjreve; ’t zów anges mer ‘sjpeLing’ zeen.
