De Cultuurpries 2017 van de Gemèndje Ech-Zöstere is toegekèndj aan Annie Schreuders-Derks. Det is gebäördj op väörstèl vanoet de bevolking en op väördrach door ’n commissie van de Klankbordgroep Cultuur. De pries, bestaondje oet o.a. de brònssculptuur “’t Zwingelke” van kunstenieër Lei Hannen, waerdje oetgereiktj bie ’n gezellig drökke bie-einkomst in ’t gemèndjehoes op zóndigmiddig 21 januari door wèthaojer Peter Pustjens. ’t Woor de veerde kieër det de Cultuurpries Ech-Zöstere waerdje oetgegaeve.
Annie Schreuders-Derks oet Zöstere is in Ech väörnamelik bekèndj es initiatiefnumster en ieëste conservator van ’t Museum van de Vrouw. Ruum 10 jaor geleje opgezatj vanoet häör prive-collectie en daonao väöl jaore succesvol actief mit ‘ne groate groep vriewilligers vanoet ’t Cultureel Centrum “De Plats” in Ech. Daonaeve is zie bekèndj vanwaege häör groate volkskundige kènnis, mit regelmaot op gans eige wies gepresenteerdj in beuk en laezinge. Annie is lid van de Commissie Cultuur van Veldeke, bestuurslid van de heem- en dialekvereniging Natuurvrienden Susteren en lid van Veldeke Krink Ech. Väör de verdeenste op provinciaal niveau kreeg zie väörig jaor de Jo Hanssen-pries.
