Dhr. Sef van Wegberg is geboren in 1936, in Pey waar hij ook opgroeide. Hij trouwde met Els van Montfort uit Echt. Zij hebben samen een dochter.
Sef van Wegberg haef ’n drök wèrkzaam laeve achter de rök: óngerwies op Aruba, lieëraar in Stramproy en Wieërt, later väörzitter vanne Katholieke ÓngerwiesVakbóndj. Het ènj van die loupbaan koom ónverwachs wie d’r in 1988 ‘ne hertaanval kreeg. Daovan herstèldj, haet hae zich aan ’t sjrieve gezatj: neet hoagdravendj – zaet hae zelf – mer eenvoudig gesjreve versjes en rijmelariekes. Wovan sommige toch echte gedichskes zeen! In eige beheer goof d’r ’n paar bundels oet: “’t Kamikazemusje” in 2003, “Leven” in 2006, “Dankbaar” in 2009 en “Aan de kirk van Pej” in 2010.
Kersvers
Misdaad ieëlenj en väöl ónvree
zoog ich weer ‘ns in gezèt en op tv
niks äöver det pas gebaore kèndj det zag:
ich höb uch get middelkes väör de vree mitgebrach.
Väöl kènne weer neet verwachte
van de groate politieke machte.
Vrede begintj namelik bie edere mins
gans in ´t klein, ich wil ´t zwaere
hae mót den waal tolerant,besjeie
en väöl tevrejener waere.
Sef van Wegberg
Muzikale nonne
Zöster Theresia tokkeldje de lier
mit äövergave en mit zwier.
Zöster Agatha, get minder muzikaal,
sloog mit äövertuging de cimbaal.
Moder äöverste beglèdje ’t stel
mit fienzinnig blokfluitspel.
Dit alles woor t’r ieëre van den Hieër
dae mit gekrómdje tene dach:
Stoptj estebleef en baetj get mieër!
Sef van Wegberg
Zandjlouper
De zandjlouper van mien laeve
löptj langzaam laeg, ich höb nog mer aeve.
De meiste zandj is al beneje.
Kort de toekóms, lank ‘t verleje.
Sef van Wegberg