Bie de fieëstelike äöpening van ‘t vernuujde Echter winkelcentrum, in bezunjer de Plats en de Baovenstestraat, zal Veldeke Krink Echt van zich laote huuere. Allerieës is dao de presentatie op zóndigmörge, tiedes ’t langste ontbijt, van oze nuje folder “Oos Plat liktj oppe Straot”. In dae folder höbbe w’r aangegaeve wo de tegels mit dialectspreuke ligke, zoadanig det m’n ze es ’n route kan loupe. Al wanjelend – ongevieër ’n half oer – kan men aan de handj van dae folder langs alle tegels loupe. De folder geuf daobie de spreuk, ’n vertaling in ’t Nederlands en de beteikenis van ’t spraekwaord. De folder is vanaaf noe bie de VVV oppe Plats gratis aaf te haole.
Tiedes ’t äöpeningsweekend zal BiblioNova oppe Plats “Aopen Daag” haoje. Op ’n laestaofel in de bibliotheek ligke bookwerkskes , oetgegaeve door de Heemkundekring en door Veldeke Krink Ech, ter inzage en te koup. Van Veldeke zeen verkriegbaar ’t Brónsgreun Beukske en de Bunjel mit dialectgedichte, oetgegaeve bie gelaegenheid van tieën jaor declamatiewedstrieje in Ech.