Sjoan aovendjwanjeling

’t Verhaol van dees waek kömtj van Wilma Dingelstad. Wilma is es bestuurslid van de Natuurhistorische Vereniging “Pepijnsland” erg betrokke bie de natuur, speciaal van oos ómgaeving en nog specialer van de Daort. In dit verhaol vertèltj ’t äöver zien wanjeling op ‘ne aovendj mit de hóndj en waat ’m den allemaol opvèltj. Marjo Jaski-Verheesen haet ’t ingespraoke.

Waat is ’t jaomer det väöl luuj, die van dees verhaole zoewe kènne genete, det nog neet doon. Reacties zeen dök: “jao, dao höb ich waal äöver gelaeze”, of “Ich weit neet wie ich det mót doon”.
Wie gezag, det is jaomer. Es g’r emes kèntj wovan g’r dènktj det hae of zie ’t ouch waal sjoan vènje óm nao oos verhaole te loestere, wies die d’r den èns op en help eventueel wie oppe website te kómme. Moeilik is ’t neet, mer m’n mót ‘ne kieër gedaon höbbe.

Zoa es bekèndj wille w’r mit dit “verhaole project” en de dao-in aangebaoje verhaole ’n biedrage levere óm de tied van get mieë thoes zitte op ’n gooj meneer door te kómme. ’t Kan haopelik ’n aangenaam óngerbraeking van d’n daag zeen. Gaer huuere w’r van uch èns waat g’r d’r van vèntj. En zótj g’r ouch ’n verhaol höbbe waat angere zoe kènne interessere, stuur ’t den nao info@veldekekrinkech.nl

Dit verhaol is weer te beloestere door op de balk ónger dees inleiding ’t drieheukske aanklikke. Väöl loesterplezeer!

“Sjoan aovendjwanjeling” (väörgelaeze door Marjo Jaski-Verheesen)

Reageren is niet mogelijk