Recepte oet de Käökelaaj

Nao ‘n langzaam begin, kömptj de väörbereiding van ’t door Veldeke Krink Ech oet te gaeve kaokbook noe good op gang. Det kömptj ouch ómdet de väörwaarde óm tót ’n kwalitatief gooj oetgave te kómme, zoaget vervöldj zeen. D’r zeen genóg recepte, wovan sommige waal hieël bezunjer. D’r zeen sponsors, die geldj of middele höbbe t’r besjikking gestèldj, wodoor de realisatie en de oetgave gein riskant avontuur is. En d’r zeen minse, die in de väörbereiding van dit book hieël get uurkes gestaoke höbbe en det nog doon. Tót det ’t book in september a.s. oet kömptj en besjikbaar is.
’t Weurtj ’n sjoan, handjzaam beukske; zoaget 70-80 recepte, neet te dik, mit ‘ne spiraalband waat erg henjig is. Inhoud: väörgerechte, hoofgerechte, naogerechte en nog get speciaal dènger.

Op dit moment waere de recepte väörgekaoktj, óm te kieke of de besjrievinge kloppe. En óm d’r ’n foto van te make. Ouch waere de kómmende maondje ’n paar preuf-aovendje gehaoje väör gruupkes minse. Bönnekort de sponsors van ’t kaokbook en vriewilligers van Veldeke Krink Ech, die regelmaotig zich inzètte väör de Krink.

Leje van Veldeke Krink Ech kènne vanaaf noe ein of mieë kaokbeukskes bie väörinsjrieving bestèlle taege de lejepries van 8 euro p’r stök, väöraaf te betale. Kiek op ’t los breefke in ’t lèste nummer van Veldeke Bekèt wie det kan en wach d’r estebleef neet te lang mit. Nao de prissentatie in september geit ’t kaokbook 12 euro koste.

Geef een reactie

Het e-mailadres wordt niet gepubliceerd. Vereiste velden zijn gemarkeerd met *