Van Huuere en Zègke…

In 2016 bestóng Veldeke Limburg 90 jaor. Om die raeje woor 2016 aangemerktj es ‘t “Jaor van de Limburgse Dialekte”. Naeve versjillendje activiteite op provinciaal niveau, reep ’t bestuur van Veldeke de aangeslaote Kringe op bezunjer activiteite in hun programma op te numme. Daobie waerdje financieel óngersteuning toegezag.

Veldeke Krink Ech haet aan deze opreup gevolg gegaeve door ’n al langer bestaondje wèns vórm te gaeve: ’n groate productie róndj sages en legendes. Det woor noe mäögelik! Mitwèrking waerdje gezóchtj en verkrege van ’n aantal anger vereniginge, ‘ne väörbereijingsgroep ging aan de slaag en ’n klein jaor later kós ’t risseltaat getuuendj waere.

Op zaoterdig 26 november en zóndig 27 november 2016 wore de väörstèllinge in de groate zaal van de Pejjerhaof in Pej-Ech. ’t Waas ’n muzikaal spektakel wo-aan versjillendje vereniginge en artieste mitgewèrktj höbbe.

Eigelik zaetj de titel alles: “Van huuere en zègke”: aoj, spannendje verhaole oet eige ómgaeving waere in meziek en väördrach op de planke gebrach en in ’t leech gezatj. Verhaole die lang geleje zeen óntstange en die hieël lang allein mer zeen doorvertèldj, van de ein op de anger generatie. En wie det den geitj….. Ze waerdje in de loup van de jaore stieëds ein bietje aangepastj, sjoner gemaaktj, akeliger, spannendjer, of geheimzinniger. Wie ze d’r oorsponkelik oetzoge, weite w’r neet mieë. Zón volksverhaol numme w’r ein sage.

De sfeer van die verhaole waerdje in de väörstèlling opgerope in de meziek van de fanfaar St. Joseph oet Pej, ’t Mannekoar van de Boesj, ‘ne combo, ’n kènjerkuuerke en versjillendje soliste: Judith Hover-Theunissen, Britt Eberson en Piet Geuskens. De kènjer zónge leedjes van de groep Carboon op gehieël eige meneer. Annie Schreuders-Derks loos zien verhaol van de Juffrouw Zónger Kop väör taege de achtergróndj van passendje meziek door de fanfaar. De prissentatie van ’t gehieël woor in henj van Henk Hover.

Det alles sfeervol van leech en geluid väörzeen door techniekminse van de Echter Revue.

’n Sjoan productie óm op trök te kieke. Gans in de sfeer van Veldeke: dialek en volksverhaole same. En daomit ’n good opstepke nao 2017, ’t jaor wo-in Veldeke Krink Ech ’n jubileum te viere haw, nl. 40 jaor bestaon.

Reageren is niet mogelijk