Tegelroute “Oos plat liktj oppe straot”

Dialectspreuke op stoeptegels in ‘t Centrum van Ech

Al vanaaf ’t moment, det door Veldeke Krink Ech ’t idee bekèndj gemaaktj waerdje, óm de winkelstraot, tegeliek mit de nuuj bestraoting, op te fleure mit tegels mit dialectspreuke, krege w’r väöl en positieve reacties. Allerieës natuurlik van de Gemèndje. Die mós det good vènje en de koste drage van dit project.

Daonao de opreup aan de minse óm spreuke in te sture: volop respons en genóg inzendinge. Tenslotte de oetveuring: ’t make en ’t plaatse van de tegels: volop mitwèrking. Naodet ènj april 2012 de spreuketegels gelag wore, kome reacties van alle kenj. Rechstreeks nao oos bestuur en via de stadsgidse en de VVV koom de vraog nao ’n pepier wo-op de spreuke vermeldj zoewe staon mit – väör degene die oos dialect neet eige zeen – ’n vertaling in ’t Nederlands en ‘ne oetlèk van waat ze beteikene. Ómdet w’r neet zoamer ’n kopietje wólle make, óntstóng ’t idee van ‘ne folder.

De ónthulling van de ieëste en teves herdenkingstegel väör ’t awd Gemèndjehoes aan de Plats woor ’n fieëstelike gebäörtenis. Oeteindelik zeen tegels gelag in de winkelstraote van ’t Centrum van Ech: de Bäövestestraot, de Plats, de Jodenstraot, de Vriethaof, de Wienstraot, de Gelrestraot, de Ursulinenstraot en ’t Ursulinenplein. Daodoor is ’n gesjikdje loup-route óntstange mit in totaal 31 tegels.

Route-folder

Toen is ouch wèrk gemaaktj van dae folder. Door financiële biedrages van o.a. de VVV, van Veldeke Limburg en van de Gemèndje Ech-Zöstere höbbe w’r ‘ne prachtige folder kènne make en laote drökke. Mit dae folder in de handj kan m’n langs alle tegels wanjele in ’n aangegaeve volgorde. Van alle tegels stuitj de spreuk vermeldj, de “vertaling” en kort ‘ne oetlèk.
De prissentatie van de folder op 30 september 2012, bie gelaegeheid van de officieel äöpening van de herinrichting van de Bäövestestraot en Plats, woor de aafsloeting van dit project.

De folder is nog altied gratis verkriegbaar bie de VVV/Bibliotheek en in ’t informatiecentrum van het Cultureel Centrum Edith Stein aan de Plats.
Oos plat liktj oppe straot en ederein kan d’r van genete!

Reageren is niet mogelijk