Op zaoterdigmiddig 24 september 2016 óm half drie smiddigs weurtj oos Kaokbook “Thoesrecepte – Recepte oet de käökelaaj” geprissenteerdj. De ieëste beukskes waere den aangebaoje aan Margot Reuten, sterkok van Restaurant Da Vinci in Maasbrach en aan börgemeister Jos Hessels van Ech-Zöstere. Dees fieëstelike bie-einkómst vuntj plaats in ’t Museum van de Vrouw aan de Plats in Ech.
Zoawaal Margot Reuten es Jos Hessels zeen dit jaor bie de 90 ambassadeurs, die Veldeke Limburg oet de ganse provincie haet aangetrókke óm ‘t 90-jaorig bestaon van de Limburgse dialekvereniging mit te óngersteune. Det leek ós ’n sjoan aanleiding óm ze te vraoge oos kaokbook in óntvangst te numme en det höbbe ze van herte toegezag.
’t Kaokbook “Thoesrecepte” haet ‘ne lange väörbereidingstied gekosj. De 80 recepte, wovan versjillende door oos leje ingebrach, zeen gekaoktj of zorgvuldig gechecktj, in dialek ómgezatj en vervolges tót ’n sjoan beukske samegebrach. Dao-in vèntj g’r väörgerechte, hoofdgerechte en naogerechte, mer ouch get typische gerechte of baksels oet dees streek.
Minse die in de väörverkoup ein of mieë kaokbeuk bestèldj höbbe, zeen deze middig ouch van herte welkom en kènne hun beukskes den geliek mit numme. Tót 20 september kan m’n det nog doon aan de väörinsjrievingspries van 10 euro. Daoväör krig m’n den ’n henjig kaokbeukske, mit ringbandj en äöverzichtelike recepte. Ouch neet-dialekspraekers zólle d’r mit äöverwaeg kènne ómdet vertalinge hie en dao staon aangegaeve.
Bestèlling is mäögelik door betaling via de bank op raekeningnummer NL 65 RABO 0138 63 19 64 ten name van Veldeke Kring Echt. Graag vermelding van naam, adres telefoonnummer en/of email adres. Nao de prissentatie is ’t allein in de bookhanjel te koup.
