Eerder jaore haet Veldeke Krink Ech, in samewèrking mit de Sjrieverskrink Midde-Limburg en diverse muzikante taege ’t ènj van de zomer ’n poëziewanjeling gehaoje in achtereinvogendj Lilbosch (2015), Zöstere (2016) en Staeveswaert (2017).
Dit jaor is op woonsdig 22 augustus a.s. het centrum van Ech de plaats van hanjeling.
In de aafgeloupe maondje höbbe de deilnummendje sjrievers zich ingespanne óm bie versjillendje puntje op de route ’n gedich of verhaol te sjrieve. Zoa kómme w’r bie ’t Rochuskepelke, bie ’t kèrkhaof van de Ursulinen, bie de aoj bewaarsjoal, ’t Karmelkloaster enz. De väördrachte waere op versjillendje plaatse ómliesj door muzikante van o.a. de hermenie. Väör alle dudelikheid: de wanjeling is gein róndjleiding. Oppe locaties weurtj gein anger oetlèk gegaeve den via de creatieve väördrachte van de sjrievers.
De wanjelroute weurtj geloupe in 2 groepe van óngevieër 30 persoane. Leje van Veldeke en anger belangstèllendje. Die höbbe zich väöraaf kènne aanmelje door betaling van 4 euro p.p. Die betaling geldj teves es deilname; m’n krig gein berich. Op dit moment kènne zich gein nuuj deilnummers mieë opgaeve, want allebei de groepe zitte vol.
Deilnummers mótte raekening haoje mit óngevieër angerhalf oer wanjele en staon. Stevige sjoon zeen aan te bevaele; ’n draagkrökske kan henjig zeen väör waem neet good kan staon. Mit ‘ne rollator mitloupe zal neet lökke i.v.m. trappe hie en dao.
Deinummers waere óm 19.30 oer verwachtj bie ’t vertrèkpuntj oppe parkeerplaats Ursulinenhof, aan de kantj van Graus-wonen. De ieëste groep vertrèktj direct óm half 8; de angere groep 20 minute later. Die zólle dus effe mótte wachte bie ’t vertrèk, mer de deilnummers bie de ieëste groep mótte nao aankomst wachte tót de angere groep bönne is, dus…. Bie de gezamelike aafsloeting is väör ederein ’n tas kóffie en de gelaegeheid óm nog get nao te kalle.
Bie raegewaer geit de wanjeling neet door en sjuuftj 2 waeke op.
Opgegaeve en achteraaf neet kènne mit loupe? Gaef det den door, den kan emes anges nog mit: tel. 411169.
