Waordebeuk

Ech kèntj twieë waordebeuk:

Seppig wiej ein smawtpaer van René Geurts.
In 1988 waerdje 11 jaor nao ziene doad esnag ‘t waordebook oetgegaeve det René Geurts op pepier haw gezatj. ’t Is ’n prachtig book mit väöl sjoan aoj weurd en gezègkdjes. In de hanjel is ’t neet mieë te kriege.’t Verdeentj opnuuj oetgegaeve te waere. Allein zoewe den mieë gangbare wäörd dao-in vermeldj mótte waere en de spelling aangepas mótte waere aan de Veldeke-spelling óm de laesbaarheid te verbaetere.

’t Brónsgreun Beukske is in de editie Ech-Zöstere door Veldeke Krink Ech in 2008 oetgegaeve es twieëdje in ’n serie Brónsgreun Beukskes. Wie de titel al aangeuf is ’t – net wie ’t Nederlandse Groene Boekje – gein ech waordebook (wie ’t book van R.Geurts) mer ’n sjriefhulp óm de dialecte van de gemèndje Ech-Zöstere good te kènne sjrieve.De gemèndje Ech-Zöstere reiktj dit beukske oet aan de nuuj inwoners vanne gemèndje. ’t Brónsgreun Beukske is nog te koup bie de bookhanjels in Ech en via Veldeke Krink Ech.

In Zöstere is in 2000 door ’’De Natuurvrienden’’ ’t waordebook: ’’Zösterse Kal’’ oetgegaeve mit waal 8.000 Zösterse dialectwäörd. Dit book versjeen in 2000 es oetgave van de Vereniging van Natuurvrienden. ’t Book is naeve waordelies van Zösters dialect nao de Nederlandse beteikenis, ouch – wie ’t väörwaord aangeuf – ’n inventarisatie van “Zösterse weurd welke vreuger zeen of noe nog waere gebroek”. De oetgave woor ’n jubileumoetgave van de Vereniging van Natuurvrienden en bevatj verder foto’s van werk van Zösterse kunstenieërs, oetdrökkinge, kènjerleedjes, waerspreuke en gedichte. De illustraties zeen van Huib Heynen. Nog verkriegbaar in ’n reproductie-vórm bie Multiprint Koolen in Zöstere (046 – 4491847).

’’De Dunne van de Nuujsjtadt’’ is ’t meist recente waordebook, oetgegaeve in 2014. Dun kèntj dit door de Heemkunde Vereniging Nieuwstadt oetgegaeve book bepaoldj gezeen waere. De samestèllers wore Mia Alberts, Jan Cox en Jo Verkuijlen. Behalve ’n oetgebrèdje waordelies (Nuujstadts – Nederlands), aangevöldj mit oetdrökkinge, staon in ’t book ’n aantal hoofdstökker äöver de gesjiedenis van De Nuujstadt, besjreve anekdotes van (awd) inwoners, gedichte en leedjes. Verder aangevöldj mit foto’s van J. Verkuijlen.
De gebroekdje spelling is die van 2003 van de Raod veur ’t Limburgs en Veldeke Limburg, die op 2 bladzijdes kort weurtj samegevatj. ’t Book is nog te koup via de Heemkunde Vereniging.

Reageren is niet mogelijk