Pierre Feller

Dhr. Pierre Feller werd 19 mei 1929 in Pey geboren. Hij huwde met Annie Maessen uit Susteren. Ze kregen 2 zonen. Pierre Feller overleed 19 november 2002 te Echt op 73-jarige leeftijd.

Pierre wèrkdje achtereinvolges bie de Staatsmiene, bie de Soda in Herten en later bie Print Service in Ech. Zien laevelank sjreef en publiceerdje hae gedichte en proza bie oeteinloupendje gelaegeheje. Hae haw zich zelf aan ’t dichte gezatj en det al doondje zoa óntwikkeldj det d’r ver baove ’t gemiddeldje oetstook.

Blaw en greun

Op eine sjoeane zomerdaag,
mót de loch blaw zeen
en neet zwanger van de walm,
en voèligheid,
die vloke taege de zon,
en mènse nao aom doon snakke,
de aerd mot greun zeen,
mèt het broen van stervendje beum.
Lachdj vals
taege het landj, dét haos verzuùptj,
in de mès van de boere productie bedriève.
Riole en aafveurpiepe
spieje daag en nach in baeke en reviere
hun rotzooi oèt.
Miëwe duuke es zilverflitse
nao het water.
De vès, dae väör het oprape lèkdj,
is e kaertje väör den doead.
e bösselke vaere lèkdj mèt geknakdje kop
és ein aanklach langs het water.

Pierre Feller (Ech)

Bòtterbleumke

Gans allein vèls doe neet op
in het greun tepijt van graas,
mér mèt doèzendj gouje köpkes
hèr en dér gezèjdj,
is het of van baove
doèzendj gouje traone zeen vergaote,
doèzendj dröppels
in ein zië van greun,
door den aom vanne wèndj
zach geweegdj.

Pierre Feller (Ech)

Mie plat

‘t Plat spraek ich mie leave lank mit leefdje
’t is wie floer, es zie väör miene kael,
’t is zwoea zuver, pront of men ’t zeefdje
’t is zoea fien, es good gebujeldj mael.

Mer mien plat, kan ouch sjerp zeen wie einen daore
’t kan dich kwaele, wie de zon op diene rögk,
’t kan dich wieë doon, wie ein handj vol nötte blaore,
doe kens ’t biete, mer ’t bietj dich zeker trök.

Mie plat, kan ich laeze en ouch sjrieve
ich bön gruuëts op ziene riekdom, ziene klank,
ich höb ’t leef, ’t zal stieëds bie mich blieve
ich num ’t met, op miene letste gank.

Ich kan ’t zeker, dao baove ouch gebroeke
mie plat is sjoean, dao is niks met aan de handj,
ich sjaam mich neet, ich hoof mich neet te hoeke,
väör mien moderspraok, de spraok van mie
Limburgs landj.

Pierre Feller (Ech)

Traone van den Hèrfs

Eine grieze sluier van mistigheid,
drieftj traog tösse stamme
van hoeag opgesjaote eike en beuke.
Van baove aaf volle in e
geliekmaotig tempo
de traone van den Hèrfs.
Het is, of de natuur janktj
bie ’t aofsjeid vanne zomer,
Mèr het kènne auch traone zeen,
van bliedsjap,
diej zil’vrig wegglibbere,
äöver het verkleuërendj blaad,
dét in zien kleuëre
de wörmdje mètdreugdj vanne zomer,
Ein begroeting vannen hèrfs

Neuw de windj het gries,
väör zich oetjeugdj,
en de zòn häör gouddröppels
tösse het bòntj vanne blajer
springkeltj
dreugtj den hèrfs eine bòntjas,
wo in de traone van den hèrfs
glinstere és diamante.

Pierre Feller (Ech)

Reageren is niet mogelijk