Frits Wilms

Ich hauw eine druim

Fortuna heist in top de vaan
Roda geit in play-off deraan
Promoveiert nao ’t Walhalla
De top van sjpelke ballaballa
Veer vier in oos sjtamkafe
’t Sukses mit interim Rene
En in ’t volgende seizoen
Wurd gael en gruin landskampioen
Mit hulp van de auwe glorie
De moewe opgesjtruip verdorie
Nuuje kootsj wurd Huub Sjtaeves
De koelszoon mit zeve laeves
van Marwijk Bert wurd assistent
Wil gein salaris , geine cent
Kieperstrainer de Coerver Frans
Veur insjpiratie en sjtimulans
Suvrijn boekt eesjte beste trip
Landj mit Air France oppe middesjtip
Es wie gesjtaoke door ein wesp
Kump aangevlaoge Ruudje Hesp
Mark kump transfervrie van Bayern
Noe gaon veer suksesse fajern
Met Happels “Foesbal, kein geloel”
Dat ronde ding mot in het doel
Pfennings Boessen Bouma Hammink
Passie is waat hun same brink
Joke Bux kump van de Antille
De nette zulle konsjtant trille
Van Real kump houteklaos
mit de boot van Sinterklaos
Paaf, ineins op dae pantoffel
Graas vraete of dronger mit de sjoffel
’t Sjtadion heisj veurtaan warempel
De Willy Dullens Voetbaltempel
Hulp kump sjpontaan van alle kenj
De penningmeister vrif zich in de henj
De fans gedrage zich korrek
Kenne weier ’t woord respek
Oet doezend kaele klink gesjreef
Henj gao omhoog, me deit de weef
Oppe graasmat golft ’t oug, caramba
’n Sjpel es wie de Braziliaanse samba
“Fortuna nao veure laot gaon
Oos klupke dat is neit te sjlaon”
In mei sjteit oppe mert ’t legioen
Fortuna toont de sjaal van kampioen
Yes veer kenne, want mit druime vink ’t aan
Vraog ’t maar Obama, dae Afro-Amerikaan

Frits Wilms, Nuujsjtadt

Lachmuulke

Lachmuulke mit dien lachkuulke ich zeen dien tenj
Lachmuulke mit dien lachkuulke gaef mich dien henj
Lachbekske in dien clownspekske laot dich mer gaon
Lach gekske mit die lachsjtekske want tis sjnel gedaon
Vang aan te lache, ich lach mit dich mit
Lache dat maak vrolik, lache hilt dich fit
Lache hilt mich laevend,’t hilt mich aan de gang
Lache hilt mich wakker, alle daag en nachte lang
Vilter niks te lache dan lach ich om mich zellef
Want zonger get te lache laefse veur de hellef
Dan kiek ich in de sjpeigel , sjeit ich in de lach
Hei dae ken ich, dae liek op mich
Waat eine gek, waat ein gezich
Want wae lach dae laef langer, wae neit lach sjteit sjtil
Wae neit lach wurd banger, dae pak zich ein pil
Lach trane mit tuite, sjlaon op dien deije
Zo langse kens fluite, al krake de kneije
Sjtop neit mit lache want dan wurse oud
Sjtopse mit lache dan besse sjnel koud

Frits Wilms, Nuujsjtadt

Limburg mien vaderlandj

Wiezo zenge veer oos volksleid in de Nederlandjse taal
Aangezeen Krekelberg zellef fier verachte vraemde praal
Al honderd jaor, dat zeen twelfhonderd maone
Raakt ’t de harte en rolle de traone

In ’t dialek sjprouk ’t volk, de wirkluuj, den elektrieker
Notabele “converseerden” in ’t Huillands, dat waas sjieker

Trots zeen maoge veer toch op oos modertaal

Basis veur kultuur, dageliks laeve en moraal
Raak geweunweg in opperste extaas
Op de golven van de kabbelende Maas
Nederlands kan toch nooit verwoorde en douge
Sentimente oet te drukke van oze harte en ouge
Gein taal angesj dan wo se mit bes opgegruijd
Rieker dan welke oug in doezend jaore opgebluijd
Omgaeve door de Belsj en de Pruus
En heel lang beheers door Kirk en kruus
Nirges in de welt besjteit eine regio

Es Limburg mit taalversjille zo legio
In oetsjpraak, in tonatie, soms kort, soms laank
Kirchraojs Zittesj Remunjs Venloes Mestreechse klaank
En de sjoonste provinsie van oos lendje is onbetwis
Neerlands zuidelikste deil zeker weite, besjlis
Het bekendst in de welt is zonger meer Andre Rieu
Oetgereik kreeg hae van eine minister, au nom de dieu
Une medaille culturelle de la France avec diploom
Toon Hermans is en dat zek ich zonger sjroom

’t Menke dat Limburg op de kaart haet gezat

Nederlandj ging letterlik veur hem plat
Arranzjemente van hermenieje , Ge Reinders blees de bloes
Complimente doon hem verblieje, de Edison kump nao hoes
Heel concreet gezeen wae kan zich mit oos sjtreekske maete
TEFAF, ’t Heuvellandj, de Peel en oos culinaire aete
Ertesop, asperges, Mosae-haai, balkebrie, zoervleisj, proeme-vlaai
Gans Limburg geit oet ziene bol en haet reuze lol
Aan de Vastelaovend, pleine en kroege loupe vol
Alle luuj zeen geliek, pakke zich biejein
Limburg erm of riek , Limburg allein
Toeriste laote hun cameraas flitsen, esse door oos lendje fitse
Japanners, Amerikane en Pole, Chineze, Italiane en Mongole
En daorom blief ich haope dat veer op eine sjone daag

Zenge “Dao is mien vaderlandj” dan is mien missie gesjlaag
Ich weit ’t zeker dat mien verlange realiteit wurd, effe wachte
Neerlands harde G wurd vervange door de Limburgse zachte
Gerard num mich neit kwaolik mit alle respek
Taal-technies is Hollands veur luuj mit ein sjpraakgebrek

Frits Wilms, Nuujsjtadt

Dichter

Waat is eigelik eine dichter
Eine poeet, eine verlichter
Dae romantiesch sjteit int laeve
Is ’t emes dae get toemaak
of missjien get korter bie raak
Of sjus get aopent, dien hart

Is ’t eine Hulpsinterklaos
Dae mit gesjtuntel en geraos
Neit wit watter mot gaeve
Gedichskes en rijmkes maak
Bie kadoos veur mechel of sjnaak
Neit van de randj wit, de gard

Eine goochelaar mit weurd
Dae neit gaer wurd gesjteurd
Fiktie en druim deit verwaeve
Neit rechoet durf te zegge
Neit goud wit oet te legge
Waat zien hertje zo verward

Door Cyrano wurd gesoufleert
Daorom onterech wurd vereert
Geweun de jong van hie naeve
Get verpak in gezjwemel
Hae belaof dich den hemel
Eine troubadoer of bard

Eine Toon mit clowneriekes
Dae mit woordsjilderiekes
Dich ’t gevuil deit gaeve
Gank mit eine lach door ’t laeve
In tieje van angs en baeve
Tot ’t einde vanaaf de sjtart

Ich zeg maar zo leif luuj
In gooj of sjlechte buuj
Wae sjrif dae altied blif
Mit potlood, pen of sjtif
Wae sjrif dae laef
Dus nich of naef
Moder, vader zuster, brouwer
Kenjer, jeug, get en veul ouwer
Sjrief want dan besjteise
Zo neit besse dood, dan geise.

Frits Wilms, Nuujsjtadt

Reageren is niet mogelijk