Gooj väördrachte bie Declamatiefinale in Panninge

Op zaoterdig 25 mei woor in DOK 6 in Panningen de Limburgse Finale van de Declamatiewedstried van dit jaor. Zeve wènnieërs van de finales van Veldeke Krink Ech in Zöstere en Pej, moogdje dao aan mit doon. Det höbbe ze allemaol prima gedaon! Väördrage in zónne theaterzaal is ’n hieël belaevenis! En dich maete mit 30 angere oet de provincie maaktj ’t bès waal spannendj. W’r wore den ouch blie verrasj mit de oetslaag van de jury:

Bie de categorie basissjoal groep 3/4:
1e plaats en dus Limburgs kampioen: Freek Swiatalski oet Zöstere.
Gedich: Is mich det sjrikke.

Bie de categorie basissjoal groep 5/6:
1e plaats en Limburgs kampioen: Mirte Pustjens oet Roostere.
Gedich: ‘ne Wèndj.

Bie de categorie basissjoal groep 7/8:
2e plaats väör Evena Kraanen oet Zöstere.
Gedich: Nemes kalt plat taege mich.

Veldeke wiltj oppe ieëste plaats dees kanjers felicitere. Mer ouch alle anger deinummers (en hun aojers) hertelik danke väör ’t mitdoon en de meujte. In totaal höbbe, äöver alle basissjoale in Ech-Zöstere verdeildj, mieë es 200 kènjer mitgedaon. Vanaaf ’t oefene op sjoal of thoes, de gehaoje sjoalfinales en de regiofinales in Zöstere en Pej. Oet al die inspanninge is dit fantastisch resultaat gekómme.

Volgendj jaor is weer ‘ne wedstried en weer ’n gelaegenheid óm mit te doon. Gaontj d’r mer vas väör zitte óm zelf ’n gedichske oet te zeuke of te sjrieve. Op de óngersteuning van Veldeke Krink Ech kèntj g’r daobie raekene!

Geef een reactie

Het e-mailadres wordt niet gepubliceerd. Vereiste velden zijn gemarkeerd met *