Al vanaaf ’t moment, det door Veldeke Krink Ech ’t idee bekèndj gemaaktj waerdje, óm de winkelstraot, tegeliek mit de nuuj bestraoting, op te fleure mit tegels mit dialectspreuke, krege w’r väöl en positieve reacties. Allerieës natuurlik van de Gemèndje. Die mós det good vènje en de koste drage van dit project: det woor gelökkig gein groat probleem. Daonao de opreup óm spreuke in te sture: volop respons en genóg inzendinge. Tenslotte de oetveuring: ’t make en ’t plaatse van de tegels: volop mitwirking.
Naodet eind april de spreuketegels gelag wore, kome reacties van alle kenj. Rechstreeks nao oos bestuur en via de stadsgidse en de VVV koom de vraog nao ’n papier wo-op de spreuke vermeldj zoewe staon mit – váör degene die oos dialect neet eige zeen – ’n vertaling in ’t Nederlands en ‘ne oetlèk van waat ze beteikene.
Van ’t ein koom ’t anger. Ómdet w’r neet zoamer ’n kopietje wólle make, óntstóng ’t idee van ‘ne folder. Tegeliek hele w’r raekening mit ’t feit det, es later tegels bie gelag zoewe waere, den dae (dure) folder al weer achterhaoldj zoe zeen. Dit waerdje namelik bie de ónthulling van de herdenkingstegel al gesuggereerdj. Baeter woor: ieës ’t tegelspreuke-project aaf te make.
Det is gelöktj. Ouch in de anger winkelstraote van ’t Centrum van Ech, de Jodenstraot, de Vriethaof, de Wienstraot, de Gelrestraot, de Ursulinenstraot en ’t Ursulinenplein en de galerie zeen noe tegels gelag. Daodoor is ’n gesjikde loup-route óntstange mit in totaal 31 tegels.
Route-folder
Intösse is ouch werk gemaaktj van dae folder. Door financiële biedrage van o.a. de VVV, van Veldeke Limburg en van de Gemèndje Ech-Zöstere höbbe w’r ‘ne prachtige folder kènne make en laote drökke. Mit dae folder in de handj kan m’n langs alle tegels wanjele in ’n aangegaeve volgorde. Van alle tegels stuitj de spreuk vermeldj, de “vertaling” en kort ‘ne oetlèk.
De prissentatie van de folder is op 30 september bie gelaegenheid van de äöpening van de herinrichting van de Bäövestestraot en Plats. Nao 30 september zal deze folder o.a. verkriegbaar zeen bie de VVV in ’t Cultureel Centrum aan de Plats.
“Oos plat liktj oppe straot en ederein kan d’r van genete!”
