Declamatiewedstried basissjoale

De väörbereidinge van de jaorlikse declamatiewedstrieje zeen weer begós. Dees waek óntvange alle basissjoale de door de wèrkgroep declamatie van Veldeke Krink Ech samegestèldje gedichtebeuk. Hie oet kènne de kènjer zich ’n gedich oetzeuke, waat ze wille väördrage. Die gedichte zeen ingedeildj in 3 categorieë: groep 3 en 4, groep 5 en 6, en groep 7 en 8 van de basissjoal. Van eder categorie zeen 5 gedichte besjikbaar. De meiste sjoale beginne nao de Vastelaovendj mit deze wedstried.

De gedichtebeuk ligke ouch in de bibliotheek / laeswinkel. Väör es ’n sjoal d’r väör keusj óm neet es sjoal mit te doon (ómdet ze bv. mit anger dènger bezig zeen in daen tied), kènne aojers altied zelf ’t initiatief numme es hun kèndj gaer mit zoe doon. Kènjer en hun (groat-)aojers kènne eventueel ouch zelf ’n gedich make. Det mót den waal voldoon aan de criteria van de anger gedichte in ‘t book.

’t Oefene mótte de kènjer ouch zelf doon. Det begintj mit ’t gedich van boete lieëre. En vervolges ’t good väördrage, eventueel mit hulp van thoes of soms ouch op sjoal. Sommige sjoale keze d’r väör óm op sjoal ’n väörrunj te haoje óm oet te make waem aan ’t vervolg van de wedstried moog mit doon: ieës de regiofinales in Ech en Zöstere en vervolges de Limburgse Finale in Panningen.

Die Regio Finales zeen dit jaor:
Väör Groat Zöstere: de 13e kieër, op zóndigmörge 29 mieërt vanaaf 10.00 oer in de Hermeniezaal in Zöstere.
Väör Groat Ech: de 19e kieër, op vriedig 3 april in de Pejjerhaof, Houtstraot 7 in Pej, vanaaf 19.00 oer.

Geef een reactie

Het e-mailadres wordt niet gepubliceerd. Vereiste velden zijn gemarkeerd met *