Daag van de Modertaal

Versjillende Veldeke Kringe bestaeje aandach aan de “Daag van de Modertaal” op 21 februari a.s. Veldeke Krink Ech duitj det ouch. Väörig jaor mit publicaties in oos Waekblaad. In dialect, oos modertaal, en det woor neet gebroekelik. Väöl minse vraoge zich aaf en spraeke ós dao waal èns op aan: woróm in ’n regionaal blaedje of op de Limburgse radio / TV-zender oos modertaal zoa weinig aan bod kömtj? Det dao-in neet alles in plat kan, is dudelik: neet alle minse die hie wone, spraeke of verstaon ’t Limburgs. Den is aanpasse gebaoje. Mer get mieë gebroek van oos modertaal zoe toch waal mäögelik mótte zeen.

Op de “Daag van de Modertaal” stuitj ’t plat in eder geval centraal. Dit jaor make w’r dao ‘ne prachtige aovendj van väör ederein dae gruuets is op zien eige Limburgse taal. Veldeke Krink Ech nuuedigtj uch oet daobie te zeen.

Twieë actrices, Gerda Schattorjé en Rezie Vrancken kómme daoväör nao Ech. ’t Programma ómvat 3 monologe: korte toneelstökskes, oetgeveurdj door eine speler. Toneel in ’t plat zeen w’r ’t meis trök es bliespel of klucht. Hieël good, mer ouch serieuzer óngerwerpe lieëne zich hie väör. In dit geval Gerda Schattorjé mit ein stökske wo-in ’n vrouw vertèltj äöver de gevolge van ’n huwelik zónger kènjer. Leefdje, verdreet, óntroering mer ouch humor kome dao in väör. ’t Anger stök geitj äöver ’t oma waere en det det bès ‘n “baan”kan zeen. Rezie Vrancken brungtj dit op ’n bietje ludieke meneer. En den is d’r nog ’n vertèlling mit jeugdherinneringe: “Kiek ze kieke”.

De monologe waere aafgewisseldj mit meziek van ’n kwintet van blaozers oet de Hermenie St. Cecilia. Det belaoftj ‘ne sjoane aovendj te waere mit volop aandach väör oos modertaal. Wie al gezag: ouch väör waem neet lid is van Veldeke. De entree is den 3 euro; geine pries toch? De aovendj weurtj gehaoje in de zaal van het Kultuurhoes , aan de Plats in Ech, ingank aan de kirkzie en begintj óm 20.00 oer.

Geef een reactie

Het e-mailadres wordt niet gepubliceerd. Vereiste velden zijn gemarkeerd met *