Bösreis nao de Voerstreek

De Voerstreek liktj in Belsj tösse de provincie Luik en aan de noordkantj oos eige Zuid-Limburg. De streek haetj häöre naam te danke aan ’t reveerke de Voer. Väöl minse kènne de streek mit sjoan natuur en dörpkes ómdet se dao good kèns wanjele en fietse. En aete!

De Voerstreek maaktj noe deil oet van de Belsje Provincie Limburg. Mer de streek haetj – net zoa wie oos eige Limburg – versjillendje machtswisselinge doorgemaaktj. Det is nag stieëds dudelijk merkbaar in de cultuur en ‘t dialek van de streek.

Zoa maakdje de Voerstreek lang deil oet van het Hertogdom Limbourg. De hoofstad daovan – het stedje Limbourg – liktj in de Provincie Luik bie Eupen net ónger de Voerstreek. Ouch oos Provincie haetj häöre naam te danke aan det Hertogdom en stedje.

Naodet in Belsj oeteindelik in 1963 de taalgrens vasgesteldj waerdje, is ‘t in de Voerstreek ènkele tieëntalle jaore politiek en maatsjappelik ónröstig gewaes. Väör de vasstèlling van dees grens huuerdje de Voerstreek tót de Frans spraekendje Provincie Luik; daonao waerdje det de Provincie Limburg, wo ‘t Vlaams de taal is. Tóch woor d’r nag lang eine Waals spraekendje börgemeister wie väöl van ós zich nag waal zólle herinnere (Louis Happard). De Belsje “taalstried” is dao toen of zien felst geveurdj.

Mit oos oetstepke op vriedig 5 juli bezeuke w’r dit jaor dao versjillendje locaties. Opgaeve óm mit te gaon, kan zoa lang es d’r nag plaats is in de bös. De koste väör leje, alles biejein en inclusief lunch zeen € 46,00 p.p.. Opgave op de gebroekelike meneer door ’t geldj äöver te make op oos raekeningnummer (achterkantj Veldeke Bekèt bie de penningmeister).

’t Programma van dae daag is: 09.00 oer vertrèk vanaaf de Nieuwe Markt in Ech. Óm zoaget 10.00 oer kómme w’r aan bie Restaurant de Pley in Voeren väör ‘n tas kóffie mit vlaai. Daonao bezeuke w’r ‘t Bezoekerscentrum Voerstreek in Voeren wo ’n prissentatie weurtj gegaeve äöver de invloed van taal/dialect op de gemeinschap; teves bezeuke w’r de historische cartotheek.

Óm 12.30 oer vertrèkke w’r noa de Abdij van Val-Dieu (Abdij van Godsdal), wo w’r ’n róndjleijing kriege. Daonao kriege w’r de lunch in het restaurant Moulin de Val Dieu. ’n Bietje laat mesjien, mer det kós neet anges. Nao de lunch gaon w’r nao de Commanderij St. Pieters-Voeren, wo w’r zoaget 16.00 oer aankómme. W’r bezeuke dao de forelle kwekerie, inclusief forelle preuverie mit consumptie. Óm zoaget 18.15 oer: vertrèk nao Ech, wo w’r róndj 19.00 weer aankómme.

Dus: mit de bös op vriedig 5 juli 2019, vertrèk vanaaf de Nieuwe Markt, Ech óm 09.00 oer.

Geef een reactie

Het e-mailadres wordt niet gepubliceerd. Vereiste velden zijn gemarkeerd met *