“Awd Pej “ in beeldj!

’t Woor ‘ne drökke Veldeke aovendj: leje, Pejjer luuj en anger belangstèllendje. Totaal zo’n hónderd persoane wore gekómmen óm ‘ne indrök te kriege van de op DVD gezatje foto- en filmbeeldje van Boep Peters van Pej in de jaore vieftig/zestig. De äöpening mit de zang van ’t koar “Tössedoor “veel al direct good in de smaak. Herkènbaar leedjes, mer ouch wie de zanggroep d’r op stòng en zich prissenteerdje woor ech sjoan.

Nao ’n korte inleiding door Arno Scheres, dae ’t filmmateriaal van de kènjer Peters ter besjikking haet gekrege, kóste – nao ’n haperendj begin – de beeldje bekeke waere. Same mit zien broor Jo haet Arno ein en anger tót ’n DVD mit meziek en tekst same gebrach. In blökskes bie-ein gebrach kome väörbie: ’t Hènge, de kerk in Pej, de nuje tore en ’n percessie, ’t verenigingslaeve wie de fanfaar en ’t Rios-kampioensjap, ’t dageliks laeve op ’t veldj (de sjaopsherder) en in de straot, compleet mit sjieëresliep en Vadah-bös, markante persoane en aoj – intösse aafgebraoke – geboewe. Ouch get beeldje van de evacuatie tiedes de oorlog. Alles reep väöl herkènbaarheid op, waat bleek oet ’t geroezemoes in de zaal. Det woor speciaal ’t geval bie de café- en zaalbeeldje oet de Sef-bar, compleet mit de jukebox, danse en sjanse. En neet te vergaete: volop segrètte rouke; det woor nog stoer in dae tied.

De väörzitter kós mit ’n tevreje geveul aan ’t ènj aafsloete, natuurlik mit dank aan degene die väör dit allesgezörgdj hawwe. Mer neet naodet ’t koar “Tössedoor” met nog ’n aantal leedjes in sfeer deze nostalgische aovendj haw aafgerundj.

Geef een reactie

Het e-mailadres wordt niet gepubliceerd. Vereiste velden zijn gemarkeerd met *