Aanmelje väör Echter Dictee kan vanaaf noe!

Nao twieë kieër ‘ne geslaagdje “flitscursus” stuitj noe ’t ieëste Echter Dictee aan te kómme. Det zal plaats vènje op zóndigmiddig 24 mieërt a.s. vanaaf 14.00 oer in de groate zaal van ’t Cultuurhoes aan de Plats in Ech. Aanmelje óm mit te doon, kan vanaaf noe.

Mitdoon kan in principe ederein: inwoners van de gemèndje Ech-Zöstere, mer ouch anger belangstèllendje oet de regio of van dao boete. Zeker ouch awd-inwoners zeen van herte oetgenuuedigdj. De titel “Echter Dictee” wiltj in eder geval neet aangaeve det allein Echtenieëre zoewe kènne insjrieve. Of wae allein Echs spruk. Wae zoew det vandaag de daag nog durve bewaere, det ‘r ’t Echter dialek of det van geliek welke anger plaats gans zuver spruktj? Daoväör is de invloed van boete aaf te groat. Ederein, kleine of groate leefhöbber van de Limburgse taal en van de spelling d’rvan kan dus mitdoon.

Waat is den waal typisch, waat dit dictee tót Echter Dictee maaktj?

  • De zinne zólle in good Echter dialek waere väörgelaeze.
  • Es criterium väör de jurering deentj de spelling oet ‘t “Brònsgreun Beukske”.

Bie ’t mitdoon zeen d’r 2 mäögelikheje: deilnumme mit jurering. ’t Dictee weurtj den nao ’t sjrieve opgehaoldj en door de jury naogekeke. Dees deilnummers kómme in aanmerking väör ‘n 1e, 2e, 3e of 4e plaats. De oetslaag van de jury stuitj neet ter discussie.

Bie ’t mitdoon zónger jurering kan ederein zelf zien of häör dictee naokieke aan de handj van de ónger de pauze geprojecteerdje gooj sjriefwieze.

Alle deilnummers, die zich höbbe aangemeldj, kriege nao aafloup ’n oorkonde. Degene mit de minste foute volges de jury, kan nao hoes gaon mit de Echter Krakeling-wisseltrofee en moog dem ’n jaor lank in bezit haoje.

De organiserendje wirkgroep van Veldeke Krink Ech haoptj det ‘t ’n gezellige wedstried zal waere ónger ’t motto: “Wae sjriftj, dae bliftj”. Aanmelje väör ’t Echter Dictee is mäögelijk tót 17 mieërt. Daonao neet mieë in verbandj mit de organisatie en väörbereidinge. Ouch mót m’n raekening haoje mit vol=vol. W’r wete neet wie graot de belangstèlling zal zeen, mer de ruumte in de zaal is neet ónbeperktj. Gaef uch dus oppertied op. Det kan mit behulp van óngerstaondje link of mit de QR-code.

Opgaaf Echter Dictee 24-03-2019

 

 

 

 

Geef een reactie

Het e-mailadres wordt niet gepubliceerd. Vereiste velden zijn gemarkeerd met *